Lafaek News–Negosiante Tome Barreto hosi aldeia Fatunaba, Suku Dare, Postu Administrativu Kristu Rei, Munisípiu Dili liuhosi fa’an Ai Funan hodi bele hatutan nafatin moris ho oan sira nian.
Negosiante Tomé Barreto mezmu triste ho kondisaun moris nu’udar negosiante, maibé la habaruk nia hodi nafatin buka moris liuhosi fa’an Ai Funan tanba liuhosi meius ida ne’e mak nia bele sustenta oan sira nia presiza no nesesidade uma laran.
Moris mesak ho feen domin ho oan na’in Sanulu resin konserteza nesesidade uma laran hakarak ka lakohi nia obrigadu tenki fa’an sasan.
“Ha’u sente triste, maibe ida ne’e mak ha’u nia moris loron-loron nian. Ne’e duni tenki pasiensia hodi simu realidade moris, tanba ha’u nia oan na’in 12 kompostu hosi mane ualu no feto ha’at. Mane ha’at no feto rua mak ramata ona sekundariu, na’in neen seluk maka seidauk ramata sekundariu,” relata Tome ba LafaekNews foin lalais ne’e iha merkadu Manleuana.
Hatutan nia, antes hanesan agora fa’an ai funan, antes ne’e fa’an uluk ai maran liuhosi dudu karosa tama sai bairru ne’ebé baibain tenki nia hala’o tanba nesesidade uma laran, maibé atividade ne’e nia hapara tanba fatór idade, tanba ne’e nia deside hodi fa’an fali ai funan.
“Ha’u husik hela fa’an ai maran, ha’u kontinua fa’an fali ai oan (ai funan) iha merkadu manleuana. Tinan sanulu ona to’o agora ha’u sei kontinua hela fa’an ai oan, hodi balun ba kultura (halo lia), balun ba oan sira nia presiza no mós balun ba presiza uma laran,” nia ramata
Jornalista : Sabina sancha
Editór : Ezequias Tomás
