Lafaek News—Ekípa Futébol Lalenok United FC sai kampiaun taxa 12 novembru hafoin iha jogu finál manan ninia adversáriu ekípa AD SLB Laulara FC ho score 5-2.
Jogu iha primeira parte ekípa rua lansa kedan atake ba malu, ekípa rua idak-idak hatudu ninia téknika jogu liuhosi asaun individu ne’ebé jogadór sira hatudu iha kampu.
Ekípa idak-idak iha ambisaun bo’ot hakarak manan iha jogu refere, tanba hanesan torneiu prestisiu (Bergengsi) hakarak ka lakohi ekípa idak-idak esforsu aan sai kampiaun iha jogu refere.
Maski iha jogu lorokaik ne’e, ekípa rua ho forsa hanesan to’o de’it iha minutu 6 liuhosi suta falta jogadór Lalenok ho numeru kamizola (10) Elias Mesquita konsege hatama golu ba rede Laulara ne’ebé hein hosi guarda rede Filonto Nogueira.
Mezmu Lalenok hatama golu uluk, maibé ekípa AD SLB Laulara FC ho espíritu kampiaun lakohi lakon, esforsu aan nafatin hodi fó ameasa dala hitu ba rede Lalenok FC, maibé tanba antisipasaun di’ak hosi guarda rede, maka AD SLB la konsege hatama bola nune’e jogu priemeira parte ramata ho score 1-0 lidera hosi Lalenok FC.
Ba iha jogu segunda parte ekípa AD SLB Laulara liuhosi ninia jogadór númeru kamizola (7) João Pedro Freitas iha minutu 52 konsege fura rede Lalenok FC nune’e obriga jogu refere tenki termina ho score 1-1.
Entretantu hakarak ka lakohi obriga ekípa rua tenki hakat ba suta penalidade, maibé iha prosesu refere sorti di’ak monu ba ekípa Lalenok United FC tanba iha rezultadu ikus ekípa Lalenok mak sai manan na’in ba taxa 12 Novembru 2020 ho score 4-1 (total 5-2 tanba sura mós ho golu iha minutu normal).
Jornalista : Rosa Fernandes
Editór : Ezequias Tomás
