Lafaek News—Relasiona ho preparasaun Natal ho tinan foun iha fulan Dezembru 2020, PNTL sei la autoriza komunidade sira halo prejepiu iha trotoar leten.
Segundu komandante PNTL munisípiu Dili superintendente Asistente polísia, Euclides Belo, husu komunidade no sarani sira tomak bainhira atu halo prezepiu labele okupa estrada públiku inklui trotoar leten no bandu joven sira hemu tua iha prejepiu oin.
“PNTL servisu hamutuk ho dioseze Dili hodi muda prezepiu tanba trotoar la’os prezepiu nia fatin maibé halo prezepiu tenke dook husi estrada no trotoar ho distánsia metru lima ba leten,” Dehan Euclides Belo ba jornalista iha KMD Kaikoli Dili, sesta (20/11/2020).
Segundu komandante PNTL munisípiu Dili ne’e, afirma nia parte garante sidadaun sira iha Dili bele hatene ida ne’e, tanba PNTL servisu hamutuk ho parte Igreja katólika inklui mós media sira nune’e kapital Dili bele sai lalenok ba ema hotu.
Nia akresenta, aliened PNTL bandu komunidade sira harii prejepiu iha trotoar bandu mós joven sira labele konsumu tua iha prezepiu oin tanba prezepiu la’os fatin atu hemu tua.
“Se mak hemu tua iha prezepiu ha’u mak ema ida primeiru hamrik iha oin tanba ne’e fo hatene ba ita nia maluk sira katak, prezepiu la’os bar no la’os fatin atu hemu tua sabu, tua mutin no tua sira seluk,” Eucldes salienta.
Jornalista : Orlando Magno
Editora : Nelya Barros
