Lafaek News— Grupu Kria Dalan Timor Leste (GKD-TL), domingu (22/11/2020), hala’o semináriu dahuluk ba juventude no estudante sira kona-ba utiliza media sosiál ho saudável no ressponsabilidade iha sosiedade atu bele promove problema sosial iha rai laran.
Koordenadór Grupu Kria Dalan Flaviano Simões de Araujo Belo, esplika semináriu ne’e hala’o durante loron tolu, iha vantajen di’ak ba estudante no juventude sira atu bele hasa’e sira nia kapasidade no koñesimentu klean liután oinsá atu bele utiliza média sosiál tuir dalan ne’ebé mak di’ak no saudável.
‘’ Semináriu ne’e atu fanun estudante no joventude sira nia hanoin oinsá sira bele iha hanoin ne’ebé mak analítiku no krítiku ba problema sosiál sira ne’ebé mak akontese husi utilizasaun média sosiál” hateten Flaviano hafoin remata semináriu ne’ebé hala’o iha Semináriu Maloa,Ailok Laran domingu (22/11).
Flaviano Simões de Araujo subliña,iha semináriu ne’e Grupu Kria Dalan utiliza métodu kursu interdisiplinar hodi akumula estudante sira iha audiutorium ida atu halo diskusaun ba isu sosiál sira ne’ebé akontese, Kria Dalan mós konvida oradór sira ne’ebé background estudu mai husi siénsia Psiokolójia nian hodi fasilita estudante sira halo mós diskusaun ba impaktu husi média sosiál ba psikolójia ema nian.
Oartisipante Idalia Lopes Belo sente kontente tanba liu husi semináriu refere bele fanun hikas nia konsénsia atu bele halo jestaun ne’ebé diak ba nia an no ba nia tempu bainhira utiliza plataforma média sosiál.
“ Iha semináriu ne’e ha’u interesante tebes kona ba tópiku ida kona-ba impaktu média sosiál ba saúde mentál, tanba husi ne’e ami aprende atu média sosiál labele kontrola fali ita maibé ita mak presiza kontrola ita nia an husi média sosiál” hateten Idalia.
Semináriu ne’e hala’o mai husi inisiativa grupu Kria Dalan Timor Leste nian ne’ebé mak hala’o iha Semináriu Maloa ho durasaun durante loron tolu hahú husi Loron 20 no remata iha loron 22 fulan novmebru tinan ne’e. Hafoin remata semináriu ne’e ne’e grupu Kria Dalan mós fahe sertifikadu ba partispante sira.
Jornalista : João do Costa Freitas
Editora : Nelya Barros
