Lafaek News—Primeiru Ministru no Ministru Interior, Taur Matan Ruak, informa iha nia parte Orienta ona Komandu Jerál atu dezarma element PNTL ida ne’ebé tiru mate sidadaun na’in rua inklui tiru kanek ema ida, iha tuku 2 madruaga iha aldeia Ainitas-Hun suku Lahane Osidental.
“Ha’u lamenta no kondena tebes aktu ne’ebé Oknum PNTL halo tan ne’e, Ita hotu la tolera ba hahalok ida ne’e, ha’u hanesan Primeiru-Ministru no Ministru Interior, orienta ba Komandu Jeral PNTL atu dezarma elementu ne’e, hatama ba sela hodi halo prosesu investigasaun,” dehan Primeiru ministru Taur Matan Ruak iha komferénsia imprensa iha palsiu governu, sábadu 05/06/2021.
PM Taur Esplika, nia parte sente hakfodak no triste bainhira rona elementu PNTL ida uza arma estadu nian tiru mate sidadaun na’in rua no ida kanek todan iha Lahane Osidental.
“Iha biban ida ne’e, hodi ha’u-nia naran rasik, no Governu tomak, hato’o mós ami-nia profundas sentidas kondolénsias ba familia matebian no husu deskulpa boot ba familia vítima sira ba hahalok ne’ebé involve hosi elementu PNTL ne’e”, PM Taur Deklara.
Entretantu Xefe Governu mós kompremitidu, sei hola medidas ne’ebé forte hasoru elementu Polisia ne’e hodi bele responsabiliza ba aktu ne’ebé nia halo no Governu sei kontinua akompanha prosesu hotu nomós sei apoiu familia matebian nian hodi hetan justisa ba akontesimetu ne’e.
Media Gabinete PM
Editór : Agapito de Deus
