Lafaek News—Komunidade Lagoa Tasi-Tolu aldeia 12 de Outobru suku Komoro ne’ebé vítima ba inundasaun iha loron 4 Abril 2021, realiza serimonia kultura nu’udar agradesimentu ba esforsu lider karizmátiku Kay Rala Xanana Gusmão ne’ebé servisu maka’as hasai bee ne’ebé nakonu durante fulan rua nia laran.
Lider Karismátiku Kay Rala Xanana Gusmão hateten, esforsu hirak ne’ebé nia ho ekipa ho komunidade sira hala’o besik besik fulan rua ona konsege hatun bee hodi komunidade sira fila-fali ba sira nia hela fatin.
“Loos duni katak besik tama fulan rua, saida mak ita promete konsege hatuun be’e hodi imi fila hikas ba uma” dehan Lider Karizmátiku Kayrala Xanana Gusmão iha nia diskursu ba serimonia rituál ikus ne’e iha lagoa Tasi-tolu Dili, sabadu, (05/06/21).
Lider Karismátiku ne’e akresenta, Loloos ohin Nia la presiza lao hale’u Tasi-tolu tomak hodi tara tais, maibé tanba deit durante fulan rua ne’e sira hari’i tiha relasaun di’ak entre komunidade ho lider Karismátiku ne’e.
“Lolos la presiza lao hale’u Tasi-Tolu tomak, maibé tanba de’it durante fulan rua ne’e ita hari’i ona relasaun diak entre imi ho ha’u no ita hotu kontente katak servisu hotu-hotu ne’ebé partisipa até labarik sira, feto sira, ferik sira hodi foti fatuk, neduni hau tenke dehan ba imi katak hotu-hotu ne’ebé servisu iha Tasi-tolu durante fulan rua voluntárius hotu, la simu osan la simu salariu, ida ne’e mak hatudu katak Timor oan bainhira haree ema seluk iha susar nia laran nia tenke to’o ba haree husu, presiza buat ruma, nia ba ajuda, presiza hasai buat ruma no hamoos buat ruma, ida ne’e mak tenke sai kultura Timor nian ho domin no lolo liman ba malu,” hakotu Lider Karizmátiku ne’e.
Entretantu vitima inundasaunLagoa Tasi-tolu, aldeia 12 de outubro kompostu husi bairo sanuluresin rua (12), ohin halibur malu hodi hato’o agradesimentu ba Lider Karizmátiku Kay Rala Xanana Gusmão ho nia ekipa ba domin no esforsu tomak hodi servisu hamutuk ho komunidade Lagoa Tasi-tolu durante fulan rua nia laran, neduni observasaun Jornalista Lafaek News iha serimonia rituál ne’e Lia-nain sira hamulak ba maromak atu haraik isin di’ak nafatin ba Lider Karizmátiku ne’e no husu rai nain Timor atu kuida nafatin hodi luta ba povu nia moris di’ak.
Jornalista : Juvita dos Santos
Editor : Agapito de Deus
