Lafaek News-Permacullture Timor-Lorosa’e (PERMATIL) sei forma timór-oan sira hodi halo konservasaun ba bee-matan iha Timor-Leste (TL) hodi fornese ba komunidade sira ne’ebé seidauk asesu ba bee-moos.
Diretór Ezekutivu PERMATIL, Eugenio ‘Ego’ Lemos, informa PERMATIL sei fó formasaun ba joven sira hosi munisípiu 12 inklui Reziaun Administrativa Espesiál Oe-Kusse Ambeno (RAEOA) hodi aumenta sira-nia koñesimentu iha área konservasaun bee-moos.
“PERMATIL iha tinan ida ne’e sei organiza akapamentu ida bolu dehan Perma Youth Training Camp 2020. Fó treinamentu ba juventude ba promosaun kulturál ne’ebé foku liubá konservasaun rekursu bee, liu-liu bee-ulun iha área foho leten sira,” afirma Ego Lemos ba Lafaek News iha Faról, Kuarta, (16/09/2020).
Nia afirma, formasaun ne’e sei hahú hosi loron-06-09, Fulan-Outubru tinan ne’e, no matéria ba formasaun ne’e prioridade liubá oinsá atu konserva fila-fali bee-debu no debu-naturál sira ne’ebé mak eziste hela iha territóriu laran.
“Ita bele ke’e fali bee-debu foun no mós trava kadalak mota-oan sira ne’ebé mak tempu udan bee halai maka’as sobu rai, entaun ida ne’e mak fó koñesimentu liu-liu ba joven sira iha territóriu laran tomak,” nia esplika.
Nia dehan, formasaun refere iha teória no prátika, nune’e atividade prátika sei hala’o iha Suku Dare, Postu Administrativu Vera Kruz, Munisípiu Dili, enkuantu totál partisipante ne’ebé daudaun ne’e rejistu ona hosi munisípiu hotu kuaze 500.
Jornalista : Aniceto da Silva
Editór : Lino Aparicio
