Lafaek News—Diretór ezekutivu Organizasaun Naun-Governamentál (ONG),Perma Kultura Timor-Leste (PERMATIL), Eujenio “Ego” Lemos, informa PERMATIL fò ona treinamentu kona-ba oinsá konservasaun Be’e nian, ba Joven Hamutuk atus haat (400), husi Munispiu 12, Inklui RAEOA.
“Outobru tinan kotuk ita halo ona treinamentu konservasaun be’e, ba juventude besik atus haat, husi fatin fatin inklui RAEOA, husi treinamentu ida ne’e sira implementa atividade konservasaun be’e no restaurasaun bee matan, Diretòr PERMATIL Eugenio “Ego” Lemos ba Lafaek News Iha Nia Kna’ar fatin Farol, Kinta 28/01/2021.
Ego Lemos haktuir, husi atividade konservasaun be’e ne’e, seidauk iha nia rezuldatu, maibè hein to’o bailoron iha fulan Agustu ho Setembru hafoin bele sukat no haree nia impaktu hatudu rezultadu iha tempu bailoron ba iha bee matan natural sira.
“Husi Konservasaun ne’ebè antes ne’e halo ha’u fò ezemplu ida iha Dare, iha tinan 2017 mai leten bailoron ona komunidade sira hadau malu ba be’e, sempre problema, maibé iha tinan 2019, PERMATIL hahù kria kaptasaun no reabilita debu natural sira iha area Dare nian be’e matan sira iha tempu bai loron komesa boot fila-fali, iha bai loron tinan 2020 komunidade sira la problema kona-ba be’e, hanesan mòs iha Lete-Foho, Mirtuto no Urahou iha rezultadu di’ak. Ego Lemos argumenta.
Haree ba rezultadu husi atividade sira ne’e atu iha nafatin koneksaun, nune’e PERMATIL kria movimentu ida naran movimentu konservasaun be’e Timor-Leste.
“Atividade konservasaun be’e hahù inisiu husI tinan 2015-2017, nia frekunesia ne’e sa’e maka’as, husi fatin ne’ebè ita halo Intervensaun ba konservasaun be’e ne’e hamutuk atus ida hitu-nulu resin haat (174), husi Munisipiu 12 no RAEOA,” katak nia.
Tuir Planu PERMATIL sei halo tan konservasaun ba be’e matan foun hamutuk fatin 11, ida mak Atauru Bikeli sei halo iha aldeia rua, iha Hera planu halo iha aldeia rua hanesan aldeia Watubou Maubara, no mòs suku Sabuli Metinaru ida, suku Uainunuk fatin ida, tuir fali mak Tibar, ekipa identifika fatin ida no sei restaura iha fulan Marsu tinan ne’e.
Jornalista : João da Costa Soares
Editora : Nelya Barros
