Lafaek News—Moris hanesan faluk idade as liután susar atu luta hasoru situasaun difisil liu-liu nesesidade lor-loron falta, maski iha oan, maibé hasoru mós situasaun ekonomia la favorese atu tulun malu hodi sees an husi moris difisil ne’e.
Uma hela fatin ba Faluk Florentina Borges Kampun Baru suku Komoro.
Iha kobertura espesial jornalista Lafaek News asuntu social konsege deteta povu kiik balun moris difisil tebes iha sustentabilidade ekonómiku ba uma laran hanesan Inan faluk Florentina Borges idade (72), moris mesak orijen husi suku Maskarinas, postu administrativu Verra-Kruz, munisípiu Dili, atual hela iha suku Komoro area Kampung Baru, loron ba kalan moris ho dependensia etu bikan ida ba ema seluk.
Bainhira dada lia ho inan faluk ne’e espresa lia-fuan dahuluk nian ho lian triste, katak iha oan nain rua, maibe husik tiha nia inan moris mesak no laiha ema ida atu ajuda inan ne’e, situasaun loron kalan nian, tuur matan-wen sulin ho nei-neik no hanoin, oinsá moris ne’e bele nune’e no bainhira mak bele remata.
“Ha’u sente triste tebes tanba agora da-daun ha’u hela mesak iha uma kiik ida nee ,no laiha ema ida atu ajuda ha’u no laiha ema ida mak atu tau matan mai ha’u, ha’u iha oan feto na’in rua maibé sira rua la tau matan mai ha’u hanesan fali ha’u la kous oan, faluk ne’e ko’alia no akompañia ho matan-wen, iha suku Komoro area Kampun Baru, (26/01/202).
Faluk ne’e konta nia esperiénsia ba kotuk katak nia hela ho ema seluk hodi fase ema nia ropa nu’udar (atan), kada fulan uma na’in selu osan $.50 hodi suporta oan feto boot nia eskola, ikus konsege eskola remata no forma tiha uma ka’in haluha nia inan rasik ne’ebé da-daun hasoru hela terus ba nesesidade uma laran.
“Ha’u nia oan feto nain rua , entre nain rua ne’e ida feto boot ne’e mak eskola remata SMA no feto kiik ne’e la eskola no durante ne’e ha’u sai hanesan ema nia atan hodi fase ema nia ropa hafoin mak ema fo netik osan $. 50 mai ha’u mak hodi haree oan nia eskola no hola hahán uma laran ,” faluk ne’e ko’alia.
Florentina konta, nia katuas oan mate dezde tempu okupasaun Indonézia iha tinan 1979, bainhira nia oan feto boot ne’e idade tinan 6 ho oan feto ida kiik foin fulan 6, momentu ne’ebá see mak atu tau matan, maibé pasiénsia de’it moris too ohin loron.
“Ha’u nia laen mate ne’e oan feto rua ne’e ida feto boot ne’e halo tinan 6 no feto kiik ne’e foin halo fulan 6 de’it, ha’u konsege haree sira rua too boot no feto boot ne’e eskola too remata SMA no ida feto kiik ne’e la eskola no durante ne’e ha’u sai hanesan ema nia atan hodi fase ema nia ropa mak suporta ba oan nia eskola, too sira na’in rua forma família hotu, maibe haree ha’u hanesan la’os sira nia inan rasik, sira rua husik de’it ha’u hanesan ema fuik ida,” Florentina deklara ho matan Ben.
Inan fauk ne’e dehan, nia la obriga nia oan nain rua ne’e atu haree, maibé fiar ba maromak no estadu ida ne’e sei bele tau matan ba nia moris ida ne’e, milagre sei mosu kuandu fiar metin ba maromak liu husi orasaun loro-loron.
Jornalista : Domingas Viana
Editora : Nelya Barros
