Lafaek news— Reprezentante Professores iha munisípiu Lautém, Lorenso Fernandes, ezijé Ministériu Edukasaun nomea urjente Diretór edukasaun munisípiu Lautém atu asina diploma estudante sira nian inklui asina mós orsamentu sira ne’ebé aloka mai iha servisu edukasaun munisípiu.
“Ami profesores sira durante ne’e servisu maibé ami nia xefe laiha kuaze tinan rua ona, husu ho urjente ba Ministru Edukasaun atu toka responsabilidade hotu atu nomea lalais ema foun ida mai hodi asina estudante sira nia diploma no atende nesesidade eskola hotu iha munisípiu, ami servisu sem orientasaun ida husi ami nia xefe, ami persiza tebes urjente Ministru Edukasaun rezolve problema Diretór Edukasaun iha Munisípiu ne’e,” katak Lorenso Fernandes ba Lafaek News iha Lautém, kinta (28/01/21).
Sorin seluk responsável servisu edukasaun Lautém, Manuel Oliveira, haktuir durante ne’e nia simu orientasaun husi administradór munisípiu hodi halo hela servisu ida ne’e maibé parte ministerial seidauk hatún despaisu ruma hodi nomea diretór foun hodi halo servisu ne’e.
“Maibé ha’u laiha kompeténsia ida hodi asina diploma estudante nian inklui legaliza diploma sira iha munisípiu ne’e,” espresa katak
Totál estudante finalista iha munisípiu Lautém hamutuk 3.700, hein hela oinsá atu diretór edukasaun foun asina estudante hirak ne’e nia diploma, enkuantu iha semana kotuk administradór munisípiu Lautém Domingos Savio promete ona katak iha fulan ne’e sei rezolve problma Diretór Edukasaun munisípiu ne’e ho urjentememte.
Jornalista : CE.Lautem
Editora : Nelya Barros
