Kovalima-(Lafaek News)—Kontribuisaun husi inan orienta Eskola Sekundária Jerál Públiku (ESGP) Suai rekruta profesores hamutuk na’in 10 hodi ajuda hanorin estudante.
Diretór ESGP Francelino Freitas, fundamenta razaun husi rekrutamentu ba profesores parsiais na’in 10 ne’e bazeia ba konkordánsia entre inan-aman ligadu ho númeru estudante ne’ebé aumenta kada tinan iha eskola Sekundária Jerál Suai .
“Profesores parsias sira ne’e ami sei selu ho osan kontribuisaun husi inan aman estudante sira, no eskola mak sei halo kontratu ho profesores sira ne’e tuir regulamentu ne’ebé hatuur husi eskola,” Diretór ESJ Suai, Francelino Freitas, ba lafaek news kinta semana ne’e.
Relasiona ho rekrutamentu profeores parsial sanulu ne’e, Eskola Sekundária jerál Suai sei fo valorizasaun ba profesor sira pasa iha selesaun final ho vensimentu mensal ne’ebé sei hahu ho $.125 kada ema.
“Sira ne’e la’os mai hanorin voluntáriu, maibe sira ne’e Parsiais, parsiais katak part time, sira mai kontribui tuir oras ne’ebé fo ona ba sira, tan ne’e eskola sei selu tuir biban ne’e, iha inisiu eskola sei selu ho Osan $125 ba kontratu fulan 3, depois ami sei avalia se sira di’ak mak ami kontinua, la di’ak mak ami sei troka ho ema seluk,” Diretur Eskola ne’e argumenta.
.Tuir planu ne’ebé deside ona iha tinan kotuk, atu halo rekrutamentu ba profesores parsiais na’in 10 ba disiplina lian Portuges, lian melayu, disiplina teknolójia no multimedia, relijiaun, desportu ho temas no literature.
Entretantu prosesu rekrutamentu ne’e hahu ho simu dokumentus rekerentes ne’ebé komesa iha loron 26 no sei taka iha loron 29 fulan janeiru 2021 ne’e.
Jornalista : Lito de Jesus (RCCT)
Editor : Chamot Nahac
