Lafaek News—Organizasaun Noun-Governamentál (ONG) Permacultura Timor Leste (PERMATI) hala’o akampamentu ho naran Perma Youth Camp 2023 iha aldeia Lakufuan suku Costa postu administrativu Pante-Makasar munisípiu Oé-cusse, hanorin partisipante sira sai ema matenek liu husi formasaun konservasaun bee, travasaun kadalak no reabilitasaun debu hodi hamoris hikas bee matan foun no aumenta hikas volume bee ba bee matan hirak ne’ebé menus.
Iha akampamentu ne’e partisipante husi aldeia Buanobe suku Banafi postu Pante-Makasar, Maria Tutfalo sente kontente ho prezensa PERMATIL iha Oé-cusse bele forma juventude sira hatene tékniku travasaun kadalak, reabilita debu natural, no konservasaun agrikultura.
“Iha ami nia suku iha tempu beiala sira nian bee nia volume makaas no be estraga de’it no ami nia beiala sira la susar ba bee, maibé tempu agroa be matan sira maran hotu, tamba ne’e agora dadaun iha ami nia sucu susar ba be tamba komunidade sira tesi ai arbiru sunu rai tamba ne fo imapaktu boot ba be tamba ne’e ami susar ba be,” dehan partisipante PERMATIL, Maria Tutfalo ba lafaek news, iha fatin konservasaun bee debu iha Lakufuan Oé-cusse, kinta semana ne’e.
Maria Tutfalo fundamentu materia ne’ebé nia hetan husi formasaun PERMATIL sei lori fila implementa hamutuk ho komunidade sira iha suku Banafi hodi halo travasaun kadalak, reabilitasaun debu natural no konservasaun agrikultura hodi hasa’e ekonomia komunidade iha baze.
“Husi esperensia ne’ebé ami hetan husi programa PERMATIL kona-ba konserva bee matan sira, liu husi satan be kee debu ami sei lori fila ba implementa fali iha ami nia suku no aldeia atu nune’e bele hamoris fila fali be matan sira tanba bee sai hanesan nesesidade importante ba ema moris, Balada no Aihoris,” Maria sublina.
Ikus liu, Maria Tutfalo mos agradese ba NGO-PERMATIL nia prezensa iha sira Nia munisipiu, tanba liu husi programa PERMATIL nian aprende buat barak husi programa ne’e no hetan esperensia barak kona-ba kuidadu be matan sira.
Obaservasaun akampamentu perma youth camp 2023 iha suku Costa adeia Lakufuan, partisipa másimu komunidade agrikultores no partisipante sira mai husi munisípiu Ermera, Aileu, Vikeke, Baukau no Oé-cusse, durasaun akampamentu ne’e rasik hala’o iha loron 21/08/2023 no sei remata iha loron 25, atividade loron ne’ebé hala’o iha akampamentu refere mak hanesan, treinamentu liu husi Teoria no prátika direta iha kampu hanesan halo travasaun kadalak, kee debu foun, reabilita debu natural no konservasaun agrikultura iha rai lolon.
Jornalista : Mateus de Deus
Editor : Agapito de Deus
