Lafaek News—Diretór ezekutivu Perma Kultura Timor Leste (PERMTIL), Ego Lemos, afirma ligadu ho akontesimentu iha loron 4, Abril 2021, sai lisaun ba Timor Leste, atu badinas kuda ai-oan hodi tahan rai iha tempu udan.
Ego Lemos hatoo asuntu ne’e hafoin halo vizita hikas bee matan antigu hat (4) ne’ebé foin moris fila-fali liu husi debu ne’ebé kee iha suku Dare.
Iha vizita ne’e PERMATIL promote sei apoiu ai- kakeu oan hamutuk 5000, ba komunidade suku Dare postu Administrativu Vera-Krus munisipiu Dili hodi halo kedas lansamentu kuda ai-oan iha suku ne’e.
Iha okaziaun ne’e, Ego Lemos fó hanoin hikas katak, dezastre naturais ne’ebé foin lalais, 04/04/2021, akontese ne’e hanesan lisaun ida ba nasaun Timor-Leste, tan ne’e semana oin PERMATIL hakarak apoiu ai-oan no lansa programa kuda ai-oan.
“Permatil iha komitmentu atu apoiu ai kakeu oan hamutuk rihun lima entaun depende ita boot sira nia vontade atu kuda ai kakeu oan nee,” dehan Prezidente Permatil Ego ba Lafaek News iha Dare Dili, foin lalais ne’e.
Ego esplika, PERMATIL nia hanoin di’ak liu halo programa ne’e depoisde udan remata lalika hein tan udan mai, tanba ema hotu la hatene tinan oin udan been nia volume hanesan tinan ida ne’e ka lae, tan nee mak sira prepara kedas halo lansamentu programa ho konservasaun debu iha Kulau I suku Dare.
“Semana oin ita lansa de’it programa kuda ai oan entaun komforme ita hakarak atu kuda atus ida ka atus rua depende ba ita nia hakarak,” Nia afirma.
Ego Dehan, hafoin halo lansamentu kuda ai oan, kada aldeia iha suku Dare ida-idak bele foti ai-oan ne’e ba kuda iha aira nia aldeia nune’e fanu estadu no governu hodi sai ezemplu ida atu reaplika iha teritóriu tomak.
Jornalista : Orlando Magno
Editor : Agapito de Deus
