Lafaek News—Moris iha uma kain ida ninia moris nakonu ho haksolok no harmonizasaun, presiza kompleta ho elementu importánsia tolu, osan, aihan no hela fatin, elementu ne’ebé nu’udar baze fundamentál tebes iha família ne’e hodi moris nakonu paz no estabilidade maka ai-han ne’ebé presiza sufisiente.
Idolózia balu ne’ebé beiala sira rai hela hanesan mensajen fundamental ida katak, haan foin bele moris, laiha hahán maka kabun sei oho fali isin lo-loon, ho nune’e hahán mak elementu ida importansia tebes atu reforsa liután fíziku isin lo-loon hodi halo atividade ruma ne’ebé interligadu oinsá bele hetan fila-fali aihan, tanba haan bosu mak bele halo servisu no bele kuda dame iha uma kain ida ninia laran.
Istória moris iha uma kain ida ne’ebé lidera husi Paulo da Conceicão no Paulina Martins, iha aldeia Lemorana, suku Dare postu administrativu Vera-Kruz, munisípiu Dili, moris iha situasaun ida ne’ebé moruk, laiha servisu atu sustenta sira nain rua ho oan nain tolu, maske nune’e ba da-daun foos iha uma laran laiha ona loron lima (5) sentavus mean ida teb-tebes mós laiha, maibé sira nain rua hatudu ezemplu di’ak ba oan nain tolu, sira nain rua (fen-laen) nunka diskute malu kona-ba foos ne’ebé da-daun ne’e laiha ona.
“Ami nain rua la hirus malu, tanba labarik nain tolu sei kiik, see ita hirus malu orsida ema viziñu sira bele mai hobur ita, importante fiar ba maromak sei loke ita nia maluk sira nia laran luak mai ajuda ita,” haktuir Paulina Martins, ba lafaek news iha atividade kobertura asuntu sosial iha aldeia Lemorana, kuarta semana ne’e.
Iha entrevista ne’e, Paulina dehan nia kaben servisu hanesan badaen halo ema nia uma hafoin hetan osan hodi sosa aihan sustenta nesesidade uma iha laran ne’e, iha fulan Abril foin lalais ema ba bolu nia kaben atu ba halo uma ida iha Bairru-Pite, foin ba servisu loron tolu de’it mákina koa azulezu (gurinda) kua tiha nia liman parte loos besik atu kotu, entau nia (Paulo) fila de’it ona ba uma hodi tau aimoruk ba liman kanek, kuaze fulan ida resin ona liman seidauk di’ak.
“Agora ita nia kondisaun mak hanesan ne’e ona hirus malu halo nusa katuas oan liman di’ak ba hodi buka servisu, liman hanesan ne’e ba buka mak kanek tan ne’e ladi’ak, bele hasusar liután, di’ak nia liman di’ak lai ba mak ba buka osan, foos bele laiha ba moos ita tenke reza atu bele hetan grasa husi maromak,” katak Paulina iha entrevista ne’e.
Paulina haktuir ba jornalista lafaek news ne’e katak da-daun foos laiha ona kuaze loron lima ona, osan mos laiha, maibé imortante mak labele hirus malu kuidade mak liman di’ak hodi buka servisu, haan lai batar fohuk uitoan balu hodi tahan moris.
“Ha’u tahek da-daun batar fohuk uitoan ne’e naran tau hela ba labarik haan,” nia ko’alia ho lian halerik.
Iha vizita jornalista lafaek news, observa mós Paulo ho Paulina nia uma laran husi dapur laran mamuk, ahi matan mate, iha balde aries rua maka tidin hela iha meza okos, ida mamuk ida seluk iha batar fohuk maka iha hela baldi laran.
Jornalista : João da Costa Soares
Editor : Agapito de Deus
