Lafaek News—Movimentu Universitáriu Timor-Leste (MUTL), ejize governu liu-liu ba Ministériu Edukasaun Juventude no Desportu (MEJD) no Ministériu Ensinu Superior Siénsia no Kultura (MESSK), atu reativa ona aula normal, no husu governu habadak aplikasaun Serka Sanitária iha Dili no Munisípiu sira
Portavoz MUTL Mauraco Coli, hateten MUTL rejeita totál sistema aula online tanba laiha formasaun husi eskola kona-ba apalikasaun, no estudante barak mak la asesu ba aula online ne’e, no mos rede internet ne’ebé da-daun ne’e la’o hanesan lenuk.
“Ami husu ba MEJD no MESSK atu reativa aula normal fali, maibé nafatin tuir protokolu husi Organisasaun Mundiál Saúde (OMS) nian,”dehan porta voz Mauraco Coli, liu husi komunikadu Imprensa iha UNTL Liceu, kuarta (28/04/2021)
Portavos ne’e dehan, MUTL husu ba governu liu husi Konsellu Ministru atu foti dezisaun hodi loke hikas dalan públiku husi Dili ba Munsipiu sira, atu estudante sira bele ba foti hahan no osan hodi uza ba sira nia nesesidade bázika no responde ba sira nia estuda, durante ne’e MUTL akompaña iha terenu nota katak, estudante husi Ensinu Primaria to’o mai Ensinu Superior barak mak sai vitima ba iha Serka Sanitária no komfinamentu domilisiáriu Iha loron 8 Marsu, no mos halo estudante barak mak hetan difikuldade ba nesesidade báziku.
“Se ejijénsia ne’ebé mak ami hato’o mak governu la aseita, MUTL sei eziji ba governu atu pausa totál ba atividade aula online, hodi fasilita estudante sira fila ba ida-idak nian munisípiu, no banhira mak aula loke fali hanesan babibain mak ami estudante sira mai fali hodi hala’o ami nia estudu,” Nia akresenta.
Jornalista : Sandi Belo
Asisten Editór : Egidio Nono
