Lafaek News—Relasiona ho kondisaun moris Paulo da Conceicão no Paulina Martins, ho oan nain tolu hela iha Aldeia Lemorana Suku Dare, Postu administrativu Vera-cruz Munisípiu Dìli, infrenta ai-han durante loron lima, ne’ebé media online lafaeknews halo publikasaun ho titulu ‘Loron Lima Ona Foos Laiha, Paulo Liman Kanek Iha De’it Uma’ konsege hetan apoiu husi pessoal balun, nune’e nia parte agardese ba maluk sira nia tulun.
Tuir Amino Makikit Ramelau, ne’ebé apoiu nesesidade bazika ne’e haktuir, apoiu ida ne’e la’os ho intesaun politika maibé nu’udar Timor oan hakarak ajuda malu ne’e inportante tanba iha situasaun ida ne’e ema barak halerik ba ai-han.
“Ami intensaun mai ne’e la’os vida politika ita hanesan hotu, maibé ita han ita mós hanoin viziñu sira iha ita nia sorin ne’e sei han hanesan ho ita ka lae, tanba ne’e mak ami hare’e notisia ne’ebé maun sira publika iha media, ami foti desizaun katak tenki tun ba ajuda lalais maluk sira ne’e,” Infórma Amino ( Makikit Ramelau), ba Lafaeknews iha Lemorana, sesta, (30/04/2021).
Nia hatutan, mezmu sasan sira ne’e uituan maibé maluk sira bele han loron ida rua hodi augenta no hein fali apoiu husi parte balun no mós Governu.
“Sasan ami hodi mai hanesan fóos saka tolu (3), Supermi kaixa tolu (3), no sasan rahun iha laran hanesan mina masako, masin-midar no sabaun, ida ne’e mak ami nia kbi’it, tulun ne’ebé ami halo husi ami nia fuan ho ami nia laran, nu’udar vida umanu ita ema sempre tulun malu,” nia infórma.
Alende ne’e mós Paulo da Conceicão no Paulina Martins, agradese ba lafaeknews nia servisu tanba bele hato’o ona ami nia lian ba públiku iha tempu susar nia laran no agradese mós ba maluk sira ne’ebe ajuda ona ami.
“Ami agradese ba ekipa husi Lafaeknews tanba bele fó sai ona ami nia infórmasaun, ami mós hato’o agardese ba maluk sira ne’ebé mai ami nia fatin hodi ajuda ai-han ba ami,” nia informa.
Jornalista : João da Costa Soares
Asisten Editór : Pedro de Almeida
