Lafaek News—Primeiru Ministru IX Governu Konstitusional, Kay Rala Xanana Gusmão, hateten Organizasaun Noun-Governamental (ONG) sira ne’ebe fo apoiu ba evikantes sira iha Fomentu II, governu sei hamenus osan ba ONG hirak ne’e.


“Sosiedade sivil mak fo han ba imi?, Agora ami koa ona osan ba ONG sira ne’e,” Xefe Governu Kay Rala Xanana Gusmao, hato’o lia-fuan ne’e, hafoin hamriik iha Ponte III Leten, hamutuk ho SEATOU Germano Santa Brites hodi hateke ba evikantes sira ne’ebe okupa hela Ponte III ninia okos, Kuarta (08/01/2025).
iha sorin seluk, evikantes ida ne’ebe lakohi temi naran (la fo sai identidade), informa mos ba Lafaek News katak, ONG sira ne’ebe apoiu vitima evikantes, SEATOU ameasa sei koa osan ba ONG hirak ne’e, tanba sira apoiu evikante hodi halo polemika situasaun iha ambitu eviksaun obrigatoriu.
Entretantu, Iha kalan ne’e (08/01/2025) Sekretariu Estadu Asuntu Toponomia no Organizasaun Urbana, Germano Santa Brites, mós informa direta ba evikantes ponte III okos katak komunidade sira ne’ebé rona ONG sira mai polítiza sai polémika hodi apoiu komunidade lakohi sai hosi hela fatin, governu sei la fo osan ba sira (ONG).
Entretantu, iha mobilizasaun ne’e, Sekretáriu Estadu Toponimia hasai osan husi nia Bolsu fahe ba kondutor ida idak hodi enxe mina no osan hahán ba sasán na’in sira hodi fila ba sira nia hela fatin, osan ne’ebé SEATOU fahe kada kondutor osan balun ho total $ 250 no balun hetan $ 300, inklui fo mos osan hahan ba sasan nain sira, balun hetan $ 40, no balun hetan $ 60, osan ne’e ba hahán nian iha dalan ba munisipiu tuir distansia, nune’e osan ne’ebé iha SEATOU nia liman fahe hotu ona, SEATOU husu tan ba PM Xanana hodi hasai tan osan iha kareta laran intrega fali ba SEATOU hodi fo tan ba kondutor sira ne’ebé tula evikantes ba munisípiu hanesan Ermera, Suai, Bobonaro, Same no Likisá, maibe iha prosesu fahe osan ne’e la tuir regra administrasaun nian, laiha kuitansi, laiha asinatura no laiha karimbu.
Entretantu, relasiona asaun Xefe Governu ho SEATOU fahe osan direta ba kondutores sira ne’ebé tula evikantes sira ba munisípiu ida-idak, maibé autoridade local ne’e mos kestiona, osan hirak ne’e, hanesan osan estadu ou osan privadu.

“Hori-kalan ha’u nia labarik sira mai fo hatene ha’u, katak katuas Xanana hasai osan hosi bolsu, mak fahe osan ba kondutor sira, agora Xanana mak fahe ne’e relatoria atu halo oinsa, kareta sira ne’e mos naran bolu de’it, agora problema mak ne’e osan privadu ka osan husi estadu, kestiona Xefe aldea ba Lafaek News iha Fomentu I, Luis Camões iha Ponte III.
Iha observasaun Lafaek News iha terenu nota katak, iha prosesu mobilizasaun ne’e Xefe Governu Konstitusional IX ne’e rasik ajuda hiit, evikantes sira nia sasan hodi tula lisuk ba kamioneta hirak ne’ebe atu transporta vitima evikantes hirak ne’e ba munisipiu, aliende ne’e iha kalan ne’e kedan okupantes ponte III balun mos evuka ba Karantina Tasi-Tolu ho lista provizoriu uma-kain hamutuk 54 no total populasaun kompostu husi feto no mane inklui labarik hamutuk 183 abitantes.
Jornalista : Acacio Pinto
Editor : Agapito de Deus