Lafaek News—Malirin ho susuk atake labarik sira ne’ebé la hatene buat ida no sala laek, no sai vítima hosi inan-aman no governu nia konseitu muda moris no dezenvolvimentu.
Komunidade eviksaun husi Fomentu II, ne’ebé okupa Ponte Comoro II nia sorin hodi harii uma, ikus mai governu liu husi SEATOU deside hasai obrigatoriu, balun fila ba munisípiu balun tenke hala’o ponte Comoro III okos hodi aguenta hamahan-an loron ida ou rua hodi hein solusaun hosi governu nian.
Labarik sira ne’ebé ho idade sei kiik liu (fulan 5) tenke sai vítima ba konseitu inan-aman nian ne’ebé harii iha uma besik fatin risku no sai mós vítima ba polítika governu nian iha prosesu dezenvolvimentu nasional nian.
Tanba ne’e, ho kondisaun hela aguenta (provizória) iha iha okos ponte Comoro III nian, rona labarik sira tanis haklalak, lian halerik, tanba malirin, no balun hamlaha no balun tenke sofre moras tanba hetan atake husi susuk.
Observasun Jornalista lafaek news iha tereinu nota SEATOU ho Polísia Nasionál Timor Leste, halo negosiasaun ho komunidade okupante sira oinsa bele muda sira sira nia moris fatin, nune’e ekipa jestaun merkadu munisípiu Dili ajuda tula komunidade sira nia sasan ba kareta transporta ona ba sira nia hela fatin.
Haree ba situasaun ne’e, iha minute balun iha oras kalan ne’e (kuarta 08/01/2025), iha ponte Comoro III nia okos, komunidade sira simu vizita husi Primeiru Ministru Kay Rala Xanana Gusmão no Ministru Obras Publika, Samuel Marçal hodi haree direta kondisaun aguenta moris komunidade sira nian iha ponte refere nia okos.
Kuarta kalan oras tuku 9 SEATOU ho ekipa obriga muda sai vítima eviksaun ne’ebé okupa ponte III nia okos, maibé parte autoridade local Fomentu I, uma kain 120 dadus provizóriu total populasaun 247 kompostu husi mane 298 no feto 247, uma kain balun muda ona karantina Tasi-tolu hela provizóriu.
Jornalista : Acacio Pinto
Editor : Agapito de Deus