Lafaeknews-Matebian ho inisiál Olga Mendonça, hanesan pasiente Covid-19 ne’ebé hakotu ona iis iha izolamentu Vera-Krus, maibé Familia husi matebian, Olga Mendonça, rejeita no konsidera matebian la’os mate ho Covid-19, tanba matebian moras kumplikadu
Tuir oan mane husi mateibian Olga Mendonça, João Mendonça, informa, hanesan familia rejeita matebian refere mate tanba Covid-19, ho razaun, tanba antes ne’e ba hasai ona ran iha kliníka Foho Osan Mean, no iha HNGV nian, doutor sira koko dehan tensaun iha de’it 180/130, hodi hein tensaun tun ituan bele alta ba uma.
“Ami familia la simu katak ami nia inan mate tanba Covid-19, ho razaun ami ba hasai ferik nia ran iha kliníka Foho Osan mean rezultadu di’ak hela, no ami hodi ba iha HNGV doutor sira koko dehan tensaun 180/130, iha momentu ne’ebá doutor Cubano ida mak dehan ba ami katak, kuandu tensaun tun oitoan bele fila ba uma ona, ami mós fiar katak bele fila ba uma, entaun ami fila hotu tiha ba uma, bin ho katuas mak hein, no doutor sira ko’alia fali ba bin dehan ita boot nia inan pozitivu Covid-19,” esplika mate bian nia oan mane João Mendonça, ba jornalista sira iha Vera- Krus, Kinta (22/04/2021).
Matebian ho naran, Olga Mendonça, ho idade 61 no mate bian ba ospitál iha Segunda-feira meiu dia foin lalais, no iha kalan hodi kedas ba izolamentu Vera-Krus, no doutor sira halo swab deteta kedas pozitivu ba Covid-19.
“Iha ospitál Nasionál ne’e ha’u nia ferik han di’ak no ko’alia mós di’ak hela, ikus mai rona fali dehan ferik pozitivu Covid-19, maibé ha’u nia ferik tensaun mak sa’e makaas liu no moras ho paru paru tanba toba iha rai malirin no mama malus barak liu, entaun ferik moras tensaun ne’e kleur ona, paru paru ne’e mak semana rua,” dehan nia.
Nune’e nia dehan, sira halo swab ne’e mate bian dala ida de’it hetan kedas pozitivu Covid-19, maibé ninia oan sira liu tiha 24 horas mak foin rona rezultadu, no familia sira ne’ebé mak swab ne’e rezultadu negativu hotu, matebian de’it mak pozitivu.
“Se ha’u nia inan mak pozitivu entaun ami oan sira mós pozitivu hotu, tanba durante semana rua ami hamutuk ho nia, kous nia hodi ba haris fatin, ne’e ami mós pozitivu hotu ona, tanba saida mak ferik de’it mak pozitivu,” nia lamenta.
Jornalista : Sandi Belo
Asisten Editór : Egidio Nono
