Lafaek News—Ministériu Saúde liuhusi Sentru Integradu Jestaun Krize (SIJK) deside ona ho Família Matebian Olga Mendonça nian, hodi haloot mate isin iha Simitériu públiku Bekusi maibé sei tuir kultura família nian no protokolu Organizasaun mundiál saúde nian.
Tuir Kordenadór Destakamentu Reasaun Rápida(KDRR), Aurelio Guterres, informa, pasiente ida iha sala izolamentu Ver-Kruz hakotu ona iis, entaun husi parte ekipa jestaun obitu ninian kompostu husi pilar I, II, VI ministériu saúde nian inkluí mós ministériu soliedaridade sosiál, no Cruz Vermella Timor-Leste, institutu jestaun ekipamentus, konkorda hamutuk ona ho família matebian oinsá atu haloot mate isin refere
“Ohin ami sei halo preparasaun, husi família sei prepara rate, no sei halo tuir kultura hotu aban dader ba foti mate isin tuir prosesu ba haloot iha semiteriu públiku Bekusi,” esplika kordenadór destakamentu reasaun rapida, Aurelio Guterres ba jornalista sira liuhusi via telefone, kinta (22/04/2021).
Nune’e família matebian, Evangelista Mendonça Amaral, hateten, katak família enkontru ona ho SIJK no deside ona matebian haloot iha Bekussi maibé aban sei liuhusi matebian nia uma hafoin ba funebre.
“Ohin ha’u nia maun ho bin máka hasoru ona sentru integradu jestaun krize (SIJK) sira dehan aban dadersan tuku hitu sei lori matebian ba uma tau oras ida iha uma depois máka lori ba haloot iha Bekusi, no mate isin ne’e sira máka lori ba ami família matebian akompania no prepara rai kuak deit maibé haloot tuir protokolu husi OMS no Saúde nian,” nia hakotu.
Jornalista : Sandi Belo
Asisten Editór : Pedro de Almeida
