Lafaek News—Embaixada Xina iha Timor Leste, embaixadór Xiao Jianguo, afirma sei oferese vasina sinovac ho doses 100.000 ba Timor Leste hodi kombate propagasaun pandemia covid-19.
Xiao Jianguo hasai deklarasaun ne’e hafoin hasoru malu ho Primeiru Ministru Taur Matan Ruak iha palasiu governu, kinta semana ne’e, hodi hateten Xina ho Timor-Leste nu’udar amigus di’ak iha tempu naruk, no Xina konsidera Timor-Leste hanesan viziñu no parseiru di’ak, sempre fó apoiu ba prosessu luta ba independensia, konstrusaun nasionál inklui dezenvolvimentu.
“Dezde surtu ba Covid-19, Timor-Leste no Xina hamriik hamutuk no apoia malu mutuamente no Xina nu’udar País ne’ebé hatutan liman hodi haruka aviaun fretada/charter mai Timor iha prosesu ba kombate pandemia ne’e, ne’eduni bazeia ba pedidu husi parte Timor nian, Governu Xina konkorda bazeia ba pedidu husi Governu Timor – Leste atu haruka 100,000 doses vasina Sinovac ba Kovid-19 mai Governu Timor-Leste” katak Embaixadór Xina Xiao ba jornalista sira, iha Palasio Governu Dili, kinta, (22/04/21).
iha ambitu reuniaun ho Xefe Governu Timor Leste, diplomata ne’e relata, Prezidente Xinês, Xi Jinping hateten iha tempu ida katak Xina sei onra nia kompromissu atu halo vasinas ba di’ak públiku global nian. Xina firmemente fiar ba produsaun vasina ba COVID-19, di’ak públiku nian no Xina halo servisu seriamente hodi hadi’ak asessibilidade ba nasaun ne’ebé sei dezenvolve, inklui Timor–Leste.
Jornalista : Juvita dos Santos
Editor : Agapito de Deus