Lafaek News-Oknum membru Polisia Nasionál Timor-Leste (PNTL) na’in rua, Domingo ohin, 23/05/21, baku negosiante kanek Iha parte ulun hafoin simu produtu lokal Nu’u husi Likisa iha pontu entrada Tasi-tolu.
Negosiante nu’u ne’ebé vitima, Octavio Thal hatete, loron-loron sira sempre simu nu’u husi sira nia (langanan) Likisa nian, maibé ohin loron Polísia la hatan sira simu nu’u hanesan bai-bain, hodi duni no tebe, tuku to’o ulun fatuk bubu.
Negosiante Nu’u Octavio Thal ne’ebé hetan agresaun fiziku hosi Oknum PNTL.
“Ami foti nu’u husi ami langanan Likisa nian, tau ba ami nia tiga roda Polísia mai dehan labele transfere tanba ohin loron la’ós atu transfere, maibé iha ami nia sorin kareta bobot sira kontinua transfere sasan hanesan bai-bain no ami nia tiga roda para iha valeta ninin sira tau nu’u iha hau nia tiga roda, entaun Polísia mai dehan labele transfere, ‘ba ba fila fila’, entaun nia hamriik iha sorin tebe iha ha’u nia kabun, ha’u halai tia ba sorin hodi dehan, maun nu’u ne’e ohin ami hola $40 dolar nian, ne’e lori fila ba ne’ebá, aban labele ona ne’e nu’u laloir la’ós nu’u maran ne’ebé to’o aban dalaruma metan hotu estraga ona,” katak vitima Octaviano ba Lafaek News, iha nia rezidénsia bairu João Paullo ll Tasi-tolu Dili, Domingu (23/05/21).
Vitima ne’e informa, nia husu nafatin autorizasaun ba Polisia atu autoriza hodi sira bele hatuun lalais nu’u ne’e hodi sira nia langanan bele fila hikas ba Likisá, maibé Polisia nafatin la autoriza.
“Ami hatuun lalais pois nia fila ona, nia la tama mai ona, maibé Polísia nafatin duni ami dehan fila no ‘langsun’ foti hau nia nu’u soe tama valeta laran, no dada hau tun husi tiga roda, polisia nain rua mak baku hau, tebe, tuku no sama to’o hau nia ulun fatuk bubu,” Nia deklara.
Nune’e mós Lafaek News konfirma ho Segundu Komandante PNTL Munisípiu Dili, Superintendente Polísia Euclides Belo liuhosi via telefone, hatete, kona-ba kazu ne’e los duni tanba foin akontese ohin dader Iha tasi tolu, maibé Komandu PNTL Munisípiu seidauk simu relatóriu ofisiál, sé relatóriu tama máka fó sai informasaun Lolo’s ba Públiku.
Jornalista : Juvita dos Santos
Editór : Floriano Soares
