Ekipa MSFLBM lori material konstrusaun la’o ain husi aldeia Lemora hakat liu mota no sa’e rai lolon hafoin too iha defisiente Adelino nia hela fatin. foto JCS.
Lafaek News—Ekipa husi voluntarizmu liu husi Grupu Movimentu Solidariedade Fò Liman Ba Malu (MSFLBM) ne’ebè lideradu husi Nelson Turquel, oferese ona material uma nian ba difisiènsia Adelino Soares, hodi konstroi haris fatin ho sintina.
“Ha’u fò agradese ba ita boot sira nia di’ak no dalan ne’ebè mak ita boot sira ajuda ho kbi’it iha fulan ida ne’e nia laran, sente kontente tan tanba prezensa loron rua liu ba mai to’o ohin bele anima tan ha’u ho oan sira bainhira ita boot sira hakat pasu ida hodi mai to’o iha fatin ida ne’e, katak defisiente Adelino ba lafaek news nia rezidénsia Kuluhi Aidila-Laran aldeia Timor Kmanek suku Bairru-Pité, foin lalais ne’e.
Nia hatutan sente triste, tanba durante ne’e laiha ema ruma vizita hakbesik hodi husu sira nia kondisauun moris real, maibè husi prezensa lafaek news ho maluk sira ne’ebè iha bele lori haksolok ba iha uma kain simples ne’e.
“Husi ajuda ne’ebè iha bele tulun no halo kma’an kbi’it ne’ebè mak ita la to’o, halo kma’an ba oan sira, agradese ba mau-alin sira hotu ho laran kma’an hakat to’o iha ne’e, ha’u agradese ba ita boot sira maromak sei fò kbi’it ba ita boot sei husi fatin ba to’o iha fatin, husi munispiu ida ba munispiu ida, atu ita sei hasoru malu nafatin,” Adelino afirma.
Defisiénsia Adelino Soares ho nia kaben inklui ho oan na’in hitu hela iha povosaun Timor Kmanek suku Bairru-Pité, moris iha fatin ne’ebé balada sira ho animal fuik sira nia fatin, la sente lakan eletrisidade no la sama ain iha Estrada kabeer leten, loron ba kalan la’o iha dalan ne’ebé liu husi ailaran no hakur mota kadalak sira hafoin too sidade Dili hafoin asesu edukasaun no saúde.
Tulun husi maromak nian Adelino hetan material Konstrusaun ne’ebè ekipa Movimentu Solidariedade Fò Liman Ba Malu oferese, hanesan semente saka 5, besi Batan lolon 8, kalen sanulu resin Lima (15), kanuru Suru rai 1 ho (WC) sintina 1 hodi harii haris fatin no sintina ba defisiente ne’e ho nia família.
Iha fatin Hanesan kordenadòr Grupu Movimentu Solidaridade fò Liman Ba Malu Nelson Turquel Hatutan, informsaun sira ne’e konaba Maun Adelino ne’e husi Lafaeknews, entaun haruka kedas ekipa ida tun halo Identifikasaun.
“Loos duni katak ami haree Maun Adelino defiensia ain no iha difikuldade, husi Movimentu Solidariedade ami tenki halo Intervensaun ba familia ida ne’e, buat ne’ebè tenki halo imediata responde lalais mak sentina tanba durante ne’e sentina laiha, oferese mòs modo musan oinsa mai bele iha rendimentu, agora da-daun buka meius hela paniel solar ida atu tau iha ne’e bele uza, Karik iha Televizaun bele nonton no rona netik muzika ruma,” Turquel relata.
Nelson Turquel promete, apoiu Movimentu Solidaridade ne’ebè iha la’os to’o iha ne’e de’it fila ba hotu ona la’e, maibè hakarak akompaña nafatin to’o hetan rendimentu.
Observasaun Lafaek news nota ekipa Movimentu Solidariedade Fò Liman Ba Malu lori kedan terpal (kempin) hodi toba hamaluk ho defisiensia Adelino atu bele konstroi hariis fatin ho sentina entrega kedan ba defisiénsia hafoin fila-fali ba sira nia hela fatin Dili.
Jornalista : João da Costa Soares
Editór : Agapito de Deus
