Bobonaru-(Lafaek News)—Eskola Sekundáriu Téknika Vokasionál (ESTV), Malibaca Yamato Maliana, hetan estragus hosi akontesimentu bainhira mosu rai tarutu forte, hafoin ne’e akompaña kedas ho kalohan nakfilak halo rai nakukun hodi hamosu anin bo’ot nakdulas.
“Akontesimentu ne’e akontese iha loron 2 dezembru (horisehik) lorokaik maizumenus tuku 3 liu minutu 25. Derepenti anin dadulas bo’ot ho kategória tipu tornado” informa Diretór ESTV Malibaca yamato, Januario Lucio Soares ba jornalista LafaekNews, kinta (03/12).
Haktuir nia, ho akontesimentu refere estraga total sala eskola 1 ne’ebé foin halo konstrusaun inklui sala 4 ne’ebé konstrui iha 2015.
Nia hatutan, hafoin akontesimentu refere, seidauk iha parte ida liuliu hosi governu mai to’o hodi hare direita situasaun ne’e. Tanba ne’e nia afirma, sei hato’o karta ba ministériu edukasaun munisípiu Bobonaro hodi enkamina ba nasionál bele hare hodi toma konsiderasaun.
Entretantu sasin hanesan mós abitante, Domingas de Jesus, haktuir, parte lorokraik derepenti de’it mosu anin bo’ot hodi ikus rezulta estragus edifísiu ho sasán seluk.
“Ha’u hela iha área eskola tinan 10 ona, primeira vez ha’u foin hare anin bo’ot ida ho modelu kabuar no nakukun loos, tarutu hanesan kilat sa’e mai dulas ai, no rai u’ut nia rahun no bee dulas mai to’o foti kalen eskola nian,” nia konta
Afirma nia, maibé grasa maromak anin dulas ne’e mai la kleur de’it para tiha ona hodi rezulta de’it estraga sala balun.
Dehan nia, Karik mai kle’ur dala ruma eskola ne’e la aproveita kedas, maibé hafoin anin ne’e ramata udan bo’ot mós tu’un kedas. I dala ida tan grasa maromak iha akontesimentu ne’e la estraga komunidade nia uma inklui mós la iha vítima ruma (kanek ou mate).
Jornalista : Zeferino Barreto Gomes
Editór : Ezequias Tomás
