Lafaek News—Gabinete apoiu atividade Konjúje Prezidente Repúblika fó treinamentu kona-ba kulinária prepara ai-han lokál no jestaun finanseiru, ba inan feto sira hodi hasa’e sira nia esperiensia no koñesementu iha atividade negósiu.
Iha komunikadu imprensa ne’ebé lafaek news asesu iha loron kinta (03/12/2020),husi media ofisial palasiu prezidensia Bairru-pite, sita katak treinamentu ne’e durasaun loron rua komesa husi 2 to’o 3 dezembru 2020, hala’o iha Suku Madohi Postu Administrativu Dom Aleixo, hetan partisipasaun maximu hosi inan-feto sira kuaze liu na’in 50, husi suku Madohi, Comoro, Fatuhada, Kampu Alor, Bebonuk, Manleuana no Bairo-Pite.
Fernanda dos Reis Soares husi Suku Comoro, afirma katak treinamentu ba loron rua ne’e importante tebes ba inan-feto sira kona-ba oinsá jere orsamentu no prepara ai-han produtu lokál Timor-Leste ba família, turista lokál no internasionál.
Zelita de Xena husi Aldeia Beto Naroman, Suku Madohi, hatete katak, liu husi treinamentu kona-ba jestaun finanseiru bele hasa’e ona koñesementu kona-ba negosiu liu-liu oinsá bele jere osan ne’ebé mak hetan husi negósiu loron-loron.
“Hanesan inan ida iha ami-nia uma laran, treinamentu ne’e fó hanoin kle’an liu ba ami feto sira hanesan inan oinsá atu jere osan iha ami nia família. Tanba durante ne’e ami fila-liman iha ami-nia moris loron loron, ami la hatene jere finanseiru iha ami nia uma laran. Durante ne’e ami hatene deit ema sosa no ami-nia osan fila, ami la hatene kona-ba lukru no gastus. Maibé treinamentu ne’e ami bele komprende liutan.”
Purtantu inan-feto husi Aldeia Anin-Fuik suku Madohi, Fernanda de Jesus Soares, agradese tebes ba gabinete espoza nia programa formasaun ba inan-feto negosiante sira, tanba bele ajuda feto maluk sira kona-ba oinsá tein produtu lokál ne’ebé bele fó nutrisaun diak ba família ida-idak liu liu labarik kiik sira.
Xefe Suku Madohi, reprezenta autoridade Postu Administrativu Dom Aleixo, Bernardino de Cristo Ferreira “Teki Timur”, lori komunidade agradese tebes ba Gabinete Espoza Prezidente Repúblika, tanba fó ona treinamentu hodi hasa’e koñesementu kona-ba kulinária no jestaun finanseiru.
“Ha’u sente treinamentu ne’e diak tanba ba oin bele iha rezultadu ne’ebé pozetivu ba inan-feto sira. Tanba ne’e ba oin tenke aplika iha ita-nia família no ita-nia suku, maske tempu uitoan maibé importante mak tenke hatene no prátika,”.
Átividade treinamentu hanesan antes ne’e Gabinete hala’o tiha ona iha munisípiu seluk hanesan Manatuto, Liquiça, Maliana, Atauro. Tanba ne’e ba oin, Gabinete Espoza Prezidente Repúblika sei hala’o formasaun hanesan ba fatin sira iha Estrada ibun, nune’e inan-feto sira oiná prepara ai-han lokál ba vizitante sira.
Media PR
