Lafaek News—Asosiasaun Difisíensia Timor Lorosa’e (ADTL), ho total membru hamutuk rihun 38.118, no hosi númeru refere porsentu 25 mak asesu ba edukasaun, nune’e sira husu ba governu kria kondisaun ruma ba sira hanesan mós ho ema normal.
Diretór Ezekutivu ADTL, Cesario da Silva, ba LafaekNews iha Sentru Konvensaun Dili (CCD-sigla portugís), kinta (03/12) iha ambitú komemorasaun loron mundiál ba ema ho difisíensia, husu ba oitavu governu konstitusionál lideradu Jenerál Taur Matan Ruak, tenki tau prioridade mós ba difisíensia sira, tanba ema ho difisíensia mezmu sira iha kondisaun ne’ebé la hanesan ema baibain maibé tanba parte ida hosi sidadaun rai ida ne’e, hakarak ka lakohi governu tenki toma ninia responsabilidade.
“La asesu ba edukasaun tanba la iha eskola ida ne’ebé espesífiku ba ema ho difisíensia,” dehan nia
Nia hatutan, atu rezolve problema tuir esperansa ema hotu ninian, governu tenki investe makas ba setór edukasaun hodi nune’e fó biban ba ema ho difisíensia aumenta ninia abilidade.
Tanba ne’e nia husu, presiza aselera lalais atu nune’e la iha ema ida mak sente hela liu iha kotuk (terbelakang) iha rai doben ne’e.
Entretantu ikus nia salienta, hosi rihun 38.118. Númeru difisíensia matan 14.000, difisíensia tilun 12.000, difisíensia fíziku 7000 no ikus difisíensia mental 3000.
Jornalista : Rita Moniz
Editór : Ezequias Tomás
