Lafaek News- Iha dadersan loron komesa hatudu nia aan, sinál katak rai komesa naroman duni ona, Avo Ana foti nia pasta no produtu hasán ba kabas hodi hakat ba merkadu fa’an, atu nune’e bele hetan netik osan dollar 1 ka 2 hodi responde presiza iha uma laran.
Maski ho fíziku fraku, idade 84 avo Ana de Araújo hela iha Aldeia Sáre, Suku Lahane Orientál, Postu administrativu Na’in Feto, Munisípiu Dili, la sente kolen no hamlaha bainhira buka moris atu responde netik nesesidade uma laran, hodi bele aguenta moris ne’e.
Tanba mai ho prinsípiu ne’ebé kuda metin iha fuan laran katak maski difísil oinsá tiha de’it, ‘haram’ kuandu tane liman ba ema seluk hodi han.
Hare ba idade, la merese ona atu avo Ana hala’o nafatin atividade hanesan ema seluk liuliu hiit sasán ne’ebé todan.
“Produtu ne’e ha’u nia oan mak sosa hosi ema, mak ha’u mai tau iha fatin ne’e. Fa’an fali, ohin loron sorti di’ak kompradór sira sosa bele hetan dollar 2 , maibé sorti la di’ak iha dader to’o lorokraik hetan de’it dollar 1. Maibé aat liu dala ruma 5 cent de’it mós la hetan,” Avo Ana ba jornalista lafaeknews iha merkadu Taibesi-Dili, Kinta (03/12).
Durante Avo Ana fa’an ninia produtu, nunka baruk no la senti kolen, maibé sempre laran kaman ho kontenti hodi fa’an nafatin ninia sasán.
Besik tinan Ida ona fa’an iha merkadu Taibesi, maibé maski dala ruma sasán ema ladún hola la hamate ninia espíritu hodi luta ba moris mezmu la moris di’ak liu.
Avo Ana kous oan na’in Neen (6), maibé na’in Tolu mate no hela de’it na’in Tolu mane 1 ho feto na’in 2, maibé sira hotu harii ona uma kain.
Jornalista: Etelvina Sarmento
Editór : Ezequias Tomás
