Lafaek News—Organizasaun Naun Governamentál (ONG) BELUN husu ba treinadór artemarsiais liuliu ba organizasaun hirak ne’ebé foin lalais ne’e governu reativa fali, la’ós de’it hanoin fó jurus maibé tenki reforsa liuhosi hanorin doutrina no regra ne’ebé tuir valores no prinsípiu loloos artemarsiais ne’e rasik.
“Ha’u hanoin implementasaun ba iha matadalan no regulamentu sira ne’e, presiza haforsa ba membru arte marsiais hotu, oinsá atu haree tuir saida mak preve ona iha matadalan ne’e rasik,” Diretor ONG BELUN Luís Ximenes ba LafaekNews iha nia knaar fatin Fárol-Dili, kinta (03/12).
Hatutan nia, artemarsiais iha mundu la iha ida mak hanorin hodi obriga nia membru ba halo problema, tanba iha matadalan (pedoman perguruan) hanorin oinsá treinu hodi haforsa fíziku no espíritual, hametin pás no amizade, alende ne’e mós bele sai soldadu defende nasaun (kader bela negara) hosi ameasa eksterna no mós interna.
Tanba ne’e, ba ema ne’ebé hakarak involve aan ba artemarsiais ruma presiza kompriende didi’ak matadalan hosi artemarsiais ne’e rasik, la’ós hakarak tama tanba de’it maluk barak.
“Sé membru artemarsiais ida mak halo asaun ruma, ha’u hanoin regulamentu internál ne’e tenki implementa hodi regula sira, maibé karik asaun ne’e krime tenki prosesa tuir lei,” deklara nia
Jornalista : Orlando Magno
Editor : Ezequias Tomás
