Lafaek News—Prezidente Repúblika, Francisco Guterres Lú Olo, iha 3 dezembru 2020, dekreta estadu emerjénsia daualo ba loron loron tolu-nulu (30), hahú husi tuku 00.00 iha 4 dezembru 2020 no termina iha tuku 23.59 iha 2 janeiru 2021, iha territóriu nasionál tomak.
iha komunikadu imprensa ne’ebé lafaek news asesu iha loron kinta (03/12/2020) liu husi media ofisial palasiu prezidénsia, sita katak Estadu emerjénsia sei parsialmente suspende direitus ba sirkulasaun internasionál, liberdade sirkulasaun no fixasaun rezidénsia ba kualker pontu iha territóriu nasionál no direitu ba rezisténsia.
Autoridades públikas kompetentes sei impoin restrisoins nesesárias ba redusaun risku hadaet nian no ezekuta medidas prevensaun no kombate epidemia, hanesan distansiamentu sosiál, kuarentena ba suspeitu infesaun, izolamente ba moras no suspeitus, konfinamentu domisiliáriu, uzu obrigatóriu maskara, fase-liman no distánsia fízika.
Prezidente Repúblika dekreta estadu emerjénsia hafoin Parlamentu Nasionál, iha 3 dezembru, fó autorizasaun ba renovasaun.
Iha 30 novembru, membru Konsellu Superior Defeza no Seguransa no Konsellu Estadu konkorda ho Governu nia pedidu atu renova estadu emerjénsia. Membru konsellu rua ne’e rekomenda ba Prezidente Repúblika atu hato’o mensajen ba Parlamentu Nasionál husu autorizasaun ba renovasaun estadu emerjénsia tuir pedidu husi Governu
Pedidu Governu ba estensaun estadu emerjénsia ninian tanba haree ba evolusaun preokupante ba situasaun epidemiolójika no proliferasaun kazu rejistadu ho COVID-19 ne’ebé aumenta iha nível rejionál no nível mundiál. Tuir dadus husi Organizasaun Mundiál Saúde (OMS), iha 1 dezembru 2020, COVID-19 hadaet ona ba ema liu millaun neen-nulu-resin-tolu no hamate ema liu millaun ida rihun atus haat.
Organizasaun Mundiál Saúde fó-sai katak iha Indonézia, iha 1 dezembru, moras ne’e hadaet ona ba ema liu rihun atus lima no rihun sanulu resin hitu mak mate ona. Iha provinsia Nusa Tenggara, ne’ebé Timor-Leste fahe nia fronteira, iha ona kazu pozitivu rihun atu rua haat nulu resin no hamate ona ema sanulu resin sia.
Desde fulan marsu, COVID-19 nu’udar moras importadu, Timor-Leste implementa kedas estadu emerjénsia bainhira rejista kazu pozitivu ida. Implementasaun estadu emerjénsia nu’udar medidas preventiva no kontrolu COVID-19 atu hases sidadaun hotu-hotu husi kalamidade públika.
Ohin loron Timor-Leste rejista kazu pozitivu na’in-ida. Desde marsu 2020 to’o ohinloron, ema na’in-30 rekuperadu no laiha ema ida mak mate.
MÍDIA PR.
