Bobonaru-(Lafaek News)—Eskola Bázika Fílial (EBF), OPLEGUL iha Suku Holsa, Postu Administrativu Maliana Villa, Munisípiu Bobonaro, dezde harii iha tinan 2009 no halo ona ba tinan 11, seidauk hetan atensaun másimu hosi governu.
Diretór EBF OPLEGUL, Filomeno Saic Becin Soares, afirma eskola refere dezde harii mai to’o agora ninia kondisaun falta ou menus ba buat barak mak hanesan kadeira, meza, livru no infraestrutura fíziku hosi eskole refere ne’e mós do’ok tebes hosi kategoria eskola ne’ebé kualidade.
“To’o ohin loron ema ruma nunka tau atensaun mai ami nia eskola ne’e, ami sente triste tebes tanba kondisaun eskola la di’ak. Ami na’in rasik foti kalen hosi uma mai taka netik atu nune’e udan labele tama,” Diretór EBF OPLEGUL Filomeno espresa ba LafaekNews foin lalais ne’e iha Maliana.
Diretór ne’e hatutan, total estudante 144 kompostu hosi feto ema 71 no mane hamutuk 73, no profesór permanente na’in 2, kontratadu feto 2 mane 3 no voluntário feto 1 mane 1, nune’e profesór profesóra ne’ebe hanorin ho total 9.
Ikus nia husu, governu tenki toma responsabilidade ba asuntu ne’e, hodi tau netik orsamentu ruma para bele hadi’a lalais eskola refere.
“Ami la iha vontade atu hanorin tanba kondisaun eskola ne’e grave, no imi hare rasik, ami uza de’it kalen aat mak didin no eletrisidade mós la iha maski dada tiha ona mai mós abandona de’it. Sé ami husik hela entaun sasán eskola nian ema bele hasai (na’ok) hotu,” nia hakotu.
Jornalista : Zeferino Barreto Gomes
Editór : Ezequias Tomás
