Lafaek News-Ministériu Saúde(MS) Rezista tan kazu Pozitivu Covid-19 Foun ema na’in rua(2) husi Aldeia Onu-laran, Suku Maudemu, Postu Administrativu Tilomar, Munisípiu Covalima, rekupera na’in ida (1) no 23 baixa iha izolamentu Vera Kruz

“Amostra hirak ne’e seidauk halo hotu análiza, maibé husi 47 amostras ne’ebé halo ona análiza laboratóriu, deteta tan kazu konfirmadu na’in 2, kazu konfirmadu na’in rua ne’e ema familia uma laran husi estensionista, iha sira nia uma laran iha ema na’in 9, ida-ne’e signifika husi ema na’in 8 seluk  ne’ebé iha uma laran, na’in rua de’it mak konfirmadu hetan kontajiu, ka 25%( Household Secondary Attack Rat) ho kazu konfirmadu 2 ne’e, signifika iha munisípiu Covalima iha ona “Cluster”/ agrupamentu kazu konfirmadu 2, no Klauhalek, hahoris tan cluster  Onu-laran, ita hein iha “Cluster Onu -laran sei la hahoris tutan Cluster seluk) ,” Esplika Kordenadór forsa tarefa ba prevensaun no mitigasaun surtu Covid-19, Rui Maria Araújo, ba jornalista sira liu husi konferénsia imprensa iha (SIJK), CCD Domingo (28/02/2021)

Kordenadór ne’e hatutan, husi kazu konfirmadu ne’ebé anunsía, ida estudante 5-° Anu, iha eskola bazíka sentrál, Salele, Tilomar, ekipa saúde nian kordena ona ho autoridade relevante sira, hodi buka tuir dadaun ona nia kolega turma sira, nomos kolega halimar husi estudante ne’e rasik,

Nia hatete, husi kontaktu besik ne’ebé halo ho kazu primariu Klauhalek, estensionista, ema ida ne’ebé hela iha aldeia Onu-laran, suku Maudemu, postu administrativu Tilomar, komfirmadu pozitivu husi atividade buka tuir ema ne’ebé halo kontaktu besik ho estensionista ne’e hokrseik 27 fevereiru, ekipa saúde rekolla totál 90 amostras iha fatin 4; aldeia Klauhalek, aldeia belulik kraik, no iha postu administrativu Tilomar, aldeia Onu-laran, suku Maudemu, postu administrativu Tilomar, no suai vila

Nune’e kordenadór SIJK ne’e apela, husu ba inan aman estudante, nomos profesor sira iha eskola bazíka sentrál Salele atu kalma labele paníku no favor kolabora ho ekipa saúde nian, wainhira iha estudante ida pozitivu, la signifika nia bele hadaet virus ne’e ba ema hotu-hotu ezemplu konkretu máka uma kain estensionista ne’e rasik sira hamutuk na’in 8 ( la sura ho estensionista), maibé iha na’in 2 de’it mak pozitivu

” Maske nune’e, presija foti amostra, kolega turma no kolega halimar hamutuk husi estudante ne’ebé konfirmadu ona, hodi bele halo análiza laboratóriu, ekipa saúde sei foti mós amostra adional balun (randown) husi professor no estudante balun, inkluí mós iha fatin seluk iha Suai vila ba estudante no profesor sira seluk wainhira iha karik sintomas, ka sente isin manas, kakorok moras makas, mear ka inus been, favor kontaktu sentru saúde oinsá bele hetan atendimentu,” Tenik nia

Rui Informa tan, estensionista nia kolega servisu na’in 27, ho tan kontaktu besik iha familia na’in 12 hatudu rezultadu negativu, maibé ekipa saúde sei monitoriza nafatin ema sira ne’e, iha izolamentu profilaktiku obrigatóriu (kuarentena) ne’ebé halo iha ida-idak nia uma (auto-kuarentena), amostra sira seluk husi hirak ne’ebé rekolla horseik, sei halo hela análiza iha laboratóriu

Enkuantu dadus jerál, loron 28 fevereiru 2021; Kazu konfirmadu foun: 2, kazu rekuperadu: 1, kazu ativu: 23, no ema tama husi fronteira husi loron 25 to ohin liu husi dalan regular hamutuk na’in 17, no liu husi dalan iregular ne’ebé autoridade sira detekta hamutu na’in 11, sira hotu tama iha kuarentena  obrigatóriu.

Jornalista         : Sandi Belo

Asisten Editór  : Egidio Nono