Lafaek News—Afonso Maia Soares, rekere katak uluk luta mós ba prosesu libertasaun nasionál, maibé Timor ukun tiha oportunista sira mak moris di’ak, luta na’in hili lata mamuk hodi sustenta moris.
Negosiante Afonso Maia Soares. Imajen Alan.
Afonso Maia Soares ho idade 43 hanesan mós luta nain tanbá uluk kontribui ba nasaun Timor-leste hodi fo aan ba mate iha tempu funu nia laran atu hetan ukun rasik aan maibé to’o ukun rasik aan hatama dokumentus Veteranus nian naran la sai.
“Ha’u presiza governu nia tulun tamba ha’u mos hanesan ema veteranus ida ne’ebé uluk luta ba rai ida nee atu hetan ukun rasik a’an, maibé ita kiik nee dala ruma boot sira hateke ita mos la hetan,”Dehan luta nain Afonso ba Lafaek News iha Suku Madohi Dili foin lalais.
Afonso relata katak foin da-daun nia trata ona dokumentu no konsege lori dokumentu ne’e ba hatama iha Sekretáriu Estadu Asuntu Veteranus nian, maibé naran too agora laiha, tanba estadu la rekoñese ema ne’ebé luta hahú iha 1990 too 1999, maibé sira mos kontribui fo aan ba mate atu hetan ukun rasik an ne’e.
“Ko’alia loos de’it kona-ba Avo Taur, da-daun primeiru ministru ho avo Lere, uluk ami ajuda hahán ba sira ha’an iha Lolotoe munisipiu Bobonaru maibé agora sira tuur ona iha banku estadu entaun ita kiik ne’e sira hateke la hetan,” Afonso rekere.
Afonso Maia Soares, orijen husi munisípiu Bobonaru postu administrativu Bobonaru suku Hauba, maibé dezde ukun aan too agora Afonso ho nia espoza no oan na’in 6 hela de’it iha kapital Dili hodi hili lata mamuk atu bele sustenta nesesidade moris lor-loron.
Jornalista : Orlando Magno
Editora : Nelya Barros
