Lafaek News—Iha kinta feira horseik 19/11/2020 oras tuku 03:20 otl, akontesimentu ida mosu iha Hera ho tipu krime tentativa omesidiu laen ho inisial MF taa nia fen ho inisial APP, iha aldeia Mota kiik suku Hera postu administrativu Kristu Rei munisípiu Dili.
Segundu Komandante munisípiu Dili Superintendente asistente Polísia, Euclides Belo informa suspeitu ho vítima hanesan familia fen-laen no sira iha oan nain rua oan ida ho naran inisiál MPP no CPP, no motive husi akontesimentu seidauk hatene tanba vítima sei halo hela tratamentu iha HNGV.
“Akontesimentu ne’e akontese rezulta vítima APP ho idade 37 hetan kanek iha parte oin no liman fuan balun kotu inklui kanek iha isin lolon tomak, tanba hetan ta’a husi suspeitu MF ho idade 52,” dehan superintendente Asistente Euclides Belo iha Komandu Munisípiu Dili (KMD) kaikoli Dili, Sexta 20/11/2020.
Euclides relata, bainhira situasaun ne’e akontesimentu, servisu komunitária polisia no autoridade lokan informa kedas ba polísia Hera hodi asegura akontesimentu refere, no autoridade sira mos halo kedas komunikasaun ba parte ambulánsia hodi fó apoiu imediatamente vítimaba Hospital Nasionál Guido Valadares.
“Da-daun ne’e suspeitu MF detein ona iha sela KMD tuir sei aprezenta ba tribunal no vítima APP da-daun ne’e iha hela HNGV hodi halo tratamentu saúde, maibé seidauk bele halo komunikasaun tanba vítima nia kondisaun grave,” Euclides Aprezenta.
Nia afirma, Komandu munisípiu Dili halo ona relatóriu espesiál ba komandu Jerál no prosesu ba kazu ne’e link ba iha Ministériu Públiku.
Euclides fundamenta, KMD seidauk hetan informasaun klean kona-ba motivu husi akontesimentu krime tentativa ne’e, tanba vítima nia kondisaun grave hela entaun seidauk bele halo komunikasaun ho parte seguransa.
Sasán kroat ne’ebé suspeitu uza hodi hakanek vítima hanesan katana no vítima nia liman fuan ne’ebé kotu da-daun ne’e iha ona Komandu munisípiu Dili, sai hanesan evidénsia ida husi akontesimentu ne’e rasik.
Jornalista : Orlando Magno
Editora : Nelya Barros
