Lafaek News—Ezibisaun fotograpia ba komemorasaun loron Mundial ba Labarik sira iha Timor Leste, ne’ebe organiza husi FFCJ Oratório Dom Bosco (Centru Miguel Magone) ho tema Jerál “Fo Ha’u Solusaun, La’os Problema,” no nia tema espesífiku mak “Esperansa La Sai Realidade: ne’e bazea ba faktus no realidade ne’ebé akontese ba labarik sira balun sempre akompañia nia inan-aman hodi hili sasán ne’ebé iha valór ekonómiku husi lixu Tibar.
Feira fotograpia ne’e foku liu ba atividade hili lixu Tibar ne’ebé involve direita husi labarik minoridade hanesan Rita idade 8, ho Flavia idade 9 sira nain rua sempre pasa nia tempu tomak ho nia inan sira hodi hili lixu iha fatin lixu Tibar postu Administrativu Bazartete Munisípiu Likisá.
husi atividade ne’e Rita idade 8 husi Ermera no Flavia idade 9 hosi Tasi tolu , akompañia nia inan sira hili besi a’at, lata mamuk, riti, botir no seluk tan tau hamutuk hodi fa’an atu hetan osan, husi rezultadu fa’an ne’e mak sosa hahán antede ba nesesidade uma lara.
Maske Governu Timor Leste ratifika ona lei konvensaun direitu ba labarik sira, maibé implementasaun ba lei ne’e rasik la sai realidade, iha lei artigu 17 ne’ebé ko’alia kona-ba moris ne’ebé sufisiente no artigu 18 ko’alia kona-ba direitu ba saúde no ba servius saúde.
Aliende iha mós lei artigu 25 ko’alia kona-ba direitu ba edukasaun ida ho kualidade ho respeita ba oportunidade hanesan, maibé lei hirak iha leten nia implementasaun seidauk bele sai relalidade ba labarik sira ne’ebé hili lixu ho nia familia sira iha lixu Tibar, tanba Rita idade 8 la asesu ba eskola, ho razaun nia aman mate, tanba ne’e nia inan faluk laiha osan atu selu nia ba eskola no Flavia eskola iha Tasi Tolu, maibé ekonomia uma laran la sufisiente maka obriga Flavia mos tuir nia avo feto hili mós lixu Tibar hodi fa’an ba kompania sira ne’ebé sosa besi a’at sira iha lixu fatin Tibar.
Autor : Acacio Pinto
