Lafaek News— IX governu konstitusional Ministériu Justisa (MJ) sei esforsu hodi normaliza kestaun krize kaderneta pasaporte iha ukun oitavu governu ne’ebé hamosu preukupasaun maka’as iha públiku.
“Ministériu prontu ona ho ekipa ne’ebé serbisu atu atende ba kaderneta pasaporte nian, ho esforsu hotu-hotu ne’ebé halo nanis ona hodi kontinua halo atu iha tempu badak bele halo ona finalidade aprova ba iha nia modelu iha pasaporte nia laran, hein katak tempu ne’ebé besik kompañia bele produz ona kaderneta foun,” Ministru Justisa Amandio de Sá Benevides hafoin remata reuniaun dahuluk Konsellu Ministru iha Palásiu Governu, tersa (04/07/2023).
Governante ne’e deklara, hanesan foin lalais ema hotu rona hafoin Govenu da-sia simu posse, katak programa prióridade iha governu da-sia iha Ministériu Justisa ninian kona-ba loron 120 no programa tuir mak ekipamentus eletrónika ne’ebé atu prodús Buletin Identidade (BI), no halo formulariu ne’ebé atu halo sertidaun kazamentu nian no sertidaun rai nian no síra selu-seluk.
“Primeiru Ministru fó enfaze atu tau prióridades ba kaderneta pasaporte ne’e hodi bele resolve kestaun kaderneta pasaporte ne’e, tanba antes ne’e sidadaun barak mak kestiona”, katak MJ Amandio.
Amandio argumenta, kaderneta pasaporte laiha ne’e faila iha haree tempu kontratu, kontratu ne’e loloos tinan rua tolu, maibé kontratu ne’e mate tiha tinan hirak liu ba, depois de Covid-19 ema la sai, entaun ema ladun tau importánsia, kuandu Covid-19 ne’e hotu ona ema hotu hakarak sai.
“Tempu ne’ebá iha hela kaderneta mamuk ne’e barak, maibé ema hotu-hotu hakarak iha pasaporte atu sai, entaun previzaun ne’ebé mak iha Ministériu liu-liu diresaun Jerál notariadu prepara hela atu bele atende nesésidade fulan-fulan 15 mil,25 mil ne’e liu fali ida ne’e, previzaun atu to’o iha Juñu 2023 hotu tiha iha 2022 infelizmente iha tempu ne’eba laiha orsamentu ne’ebé mak tau hodi bele prodús, iha hela situasaun ida ne’ebé mak difisil.
Ikus Ministru Justisa IX governu ne’e katak, ba da-daun governu da-sia ne’e koko atu tau Orsamentu Jerál Estadu, notifikativu maibé sei diskuti iha konsellu Ministru nune’e bele iha solusaun di’ak hodi bele responde lalais nesésidade sidadaun sira ne’ebé presija lalais pasaporte kaderneta.
Jornalista : Rita Moniz
Editór : Agapito de Deus