Lafaek News_Diretora Ezekutivu Forum Komunikasaun ba Feto Timor-Leste (Fokupers), Domingas Afonso Amaral, apresia ba IX Governu Konstitusional ne’ebé lidera husi Primeiru-Ministru (PM) Kay Rala Xanana Gusmão hodi foti desizaun seriu atu ezonera Presidente Autoridade Munisipal Aileu (PAM-A), João Bosco dos Santos.
“Fokupers hakarak fó apresiasaun tanba Governu liu hosi Primeiru-Ministru foti desizaun ida ne’ebé seriu atu bele ezonera Presidente Autoridade Munisipiu husi ninia pozisaun ne’ebé dadaun ne’e nia titula ba,”Diretora Fokupers, Domingas Afonso Amaral, ba jornalista sira iha Salaun Delta Nova, Dili, Segunda 27/07/2026.
Nia hatete, Fokupers lamenta lideransa ne’ebé iha hahalok la tuir nu’udar lideransa nian, hodi la konsege asegura feto no labarik vulnerável sira iha Munisipiu Aileu nune’e bele livre husi diskriminasaun no hahalok insultu sira.
“Ba Fokupers, ami nia pozisaun maka lamenta. Ami lamenta ho hahalok lider ema ne’ebé lolos iha pozisaun atu asegura katak feto, labarik, no ema vulnerável sira hotu iha komunidade Aileu bele hetan moris ida ne’ebé livre husi diskriminasaun, livre husi hahalok insultu no livre husi violénsia. Maibé situasaun ne’e sei mosu, entaun ita triste ho ida ne’e,” nia lamenta.
Aleinde ne’e, parte husi Fokupers nia pozisaun maka halo aproximasaun lubuk ida, inklui aproximasaun balun ne’ebé lao ho lian ki’ik.
Nia haktuir, Fokupers halo advokasia ne’ebé foku ba aproximasaun no influensia ba desizaun polítika nain sira. Nune’e halo mos advokasia iha media sosial hodi hato’o estatementu krítiku ba polítiku nain sira atu foti desizaun.
“Ita halo advokasia ne’ebé mak ita aproxima no influensia iha desizaun polítika sira. Entaun ita hare’e katak aleinde ita halo advokasia iha media sosial atu hato’o ita nia estatementu krítiku sira, maibé ita mos influensia direita ba ema sira ne’ebé foti desizaun,”nia esplika.
Kona-ba konfidensialidade vítima nian, nia dehan ne’e hola parte hotu ba kazu sira seluk ne’ebé resista ona iha Uma Mahon. Fokupers fó asistensia ba kazu sira hotu, la’os ba kazu iha Aileu ne’e de’it. Tanba ne’e Fokupers nafatin suporta feto no labarik vulnerável sira ne’ebé hetan torturasaun husi parte sira.
Jornalista: Moises Guterres
Editora. : Gracia Soares
