Lafaek News – Suku Fatumakerek, Postu Administrativu Laklubar, munisípiu Manatuto, mezmu Timor Lorosa’e restaura ona independénsia tinan 18, maibé populasaun balun sei sente sei do’ok hosi dezenvolvimentu eletrisidade.
“Ami suku Fatumakerek, to’o ohin loron ita ukun a’an ona seida’uk asesu ba liña eletrisidade, estrada no bee moos,” Xefe suku Fatumakerek, Gaspar José Fatima da Costa, dehan ba LafaekNews iha CCD-Dili, kuarta (23/12).
Komunidade sira tenke kreatividade halo kamii ho kabas rahun hodi sunu ho mina-rai halo lakan iha tempu kalan nune’e fasilita oan sira estuda.
“Komunidade sira tenke sunu kamii, no lampu (uza minarai) hodi halo naroman iha tempu kalan, atu nune’e ami nia oan sira bele estuda, tanba la asesu ba eletrisidade,” tenik nia
Nia akresenta, problema eletrisidade, dezafiu seluk ne’ebé suku ne’e enfrenta maka kondisaun estrada ladún di’ak, ne’ebé liga hosi postu mai suku refere kuaze kilu-metru 3, nune’e hatodan liután komunidade ne’ebé maioria moris hanesan toos na’in atu lori sira nia produtu ba fa’an iha merkadu.
“Populasaun suku Fatumakerek barak mak vida agrikultór, atu lori sai produtu lokál hodi asesu ba merkadu mós la di’ak tanba dalan la iha (Aat), sá tan tempu udan hanesan ne’e la’o la di’ak, ami haruka ona proposta ba governu, atu resposta ba povu nia halerik no preokupasaun maibé seidauk iha rezultadu,” nia subliña
Tanba ne’e lideransa komunitáru ne’e husu ba governu fó prioridade ba hadia estrada no eletrisidade liu husi OJE 2021, nune’e bele solusiona populasaun sira nia esijénsia, tanba total populasaun hosi suku refere ne’ebé kompostu hosi aldeia Tolu mak hanesan Laramera, Lisuata no Sasahi hamutuk Rihun Rua Resin.
Jornista: Pedro de Almeida
Editór : Ezequias Tomás
