Bobonaru-(Lafaek News—Relasiona ho udan iha loron semana kotuk too ohin kuarta (23/12/2020), rezulta estrada ligasaun Maliana-Bobonaru kotu iha area aldeia Anahun suku Odomau impede transporte publiku no privadu susar atu ultrapasa.
Estrada diresaun entre Maliana Bobonaru kotu kauza husi udan boot durante semana ida ne’ebé hamosu bee sulin husi kadalak sira ho volume maka’as nune’e ikus mai halo rai halai husi estrada okos hodi halo dalan refere kotu.
Situasaun ne’e afeta transporte tula pasajeiru husi diresaun Maliana ba Bobonaru tenke transferénsia tanba susar ba karreta sira ultrapasa ba estrada sorin.
Too ohin kuarta, 23/12/2020, transporte públiku sira kontinua halo transferérensia pasajeirus sira ne’ebé viajen husi Maliana ba Bobonaro no husi Bobonaro ba Maliana, no transporte privadu hirak hanesan motorizadas hiit de’it husi estrada sorin ba sorin.
Observasaun Lafaek News iha terrenu nota, pasajeiru sira ho karreta anguna husi mai to’o estrada kotu refere, kada ema ida selu $1.50, ba komunidade sira hodi ajuda hiit naha ne’ebé transporta husi Maliana ba Bobonaru.
Entretantu pasajeirus ne’ebé atu pasa ferias iha Bobonaro kompostu husi Postu Administrativu Bobonaro no Postu administrativu Lolotoe. postu administrativu Bobonaro iha sukus 18 no postu administrativu Lolotoe hamutuk sukus 7.
Jornalista : Juvita dos Santos
Editora : Nelya Barros
