Lafaek News-(Soba)-Militantes husi Partidu Libertasaun Popular (PLP) ho Frente Revolusionáriu Timor Leste Independénsia (FRETILIN) husi suku Soba postu administrativu Laga afilia tomak ba partidu CNRT hodi fo vitoria ba José Ramos Horta iha loron 19 Abril hodi tau matan ba estrada ho eletrisidade ba povu suku Soba.
Portavoz Edmundo Pereira argumenta razaun sira deside afilia ba partidu CNRT tanba durante oitavu governu viabilizador lideradu Jeneral Taur Matan Ruak nia mandatu tinan 4 ona dezenvolvimentu la’o liu-liu la tau matan ba suku Soba iha ne’ebé krize estrada ho eletrifikasaun.
Ohin ami militantes partidu PLP ho FRETILIN hosi ohin ba oin ami afilia ona ba partidu CNRT hodi apoiu maun Ramos Horta hetan vitoria iha loron 19 fulan Abril, no iha eleisaun parlamentar avo Nana tenke fila-fali ba ukun hodi hadia rai ida ne’e nia dezenvolvimentu la’o ba oin,’’Portavoz Edmundo Pereira deklara afiliasaun iha diálogu ho kandidatu númeru 1 José Ramos Horta iha suu Soba postu administrativu Kuelekai, segunda (11/04/22).
Edmundo dehan, uluk ema hotu luta mak ohin loron hetan independénsia, maibé dezenvolvimentu la’o de’it iha suku balun, realidade suku Soba estrada la di’ak nafatin no eletrisidade la lakan, laran metin ba jeneral Taur Matan Ruak ne’ebé lidera governu viabilizador Fretilin, maibé haluha tiha populasaun suku Soba nia kontribuisaun.
Ami triste governu viabilizador ukun tinan 4 resin ona, maibé nunka hanoin netik populasaun suku Soba nia kontribuisaun, tanbe ne’e ami militantes partidu PLP ho Fretilin decide afilia ba CNRT hodi lori Ramos Horta ho Xanana ba ukun fali atu hadia dezenvolvimentu iha Timor liu-liu hadia estrada ho eletrisidade mai ami nia suku,’’ afirma Edmundo.
Iha fatin hanesan, delegadu partidu Fretilin suku Soba, Francisco da Costa hateten, nia parte sente triste tanba governu ida ne’e viabiliza husi ami nia partidu Fretilin, maibé haluha loos suku Soba estrada at no eletrisidade laiha dezenvolvimentu ein jeral hakdasak, Timor atu muadansa ba oin Ramos Horta ho Xanana tenke ukun fila-fali hodi tau matan ba dezenvolvimentu ba povu iha areas rurais.
Ha’u agradese ba maun Ramos Horta bele hiit an mai too ami nia fatin izoladu ida ne’e, tuir lolos la merese atu mai, ha’u delegadu Fretilin nian, ohin maun Horta mai iha ne’e atu ajuda loke ami nia konsiénsia katak ami apoiu ba ita boot hodi haree ami nia maluk sira ne’ebé moris iha areas remotas, ami nia partidu mak ukun maibé la realiza sira nia promesas hadia estrada no harii eletrisidade ba suku Soba ami la sente duni ukun an ida ne’e,’’ afirma delegadu partidu FRETILIN suku Soba ne’e.
Delegadu Fretilin suku Soba ne’e dehan, kandidatu númeru 1, José Ramos Horta manan tiha ona, tanba la’os ema bai-bain mak nomeia, eis komandante das Falintil, Kay Rala Xanana Gusmão mak nomeia, husu atu hala’o konpremisu iha kampaña katak tenke ko’alia ho governu hodi tau matan ba populasaun kiik iha remotas, edukasaun, saúde, estrada no eletricidade.
‘’Ikus liu, maun Horta manan tiha ona, tanba komandu da luta mak nomeia, más keta haluha tenke realiza ita boot nia kompremsiu, tenke fanun bei-beik governu hadia estrada, edukasaun, saude ho eletrisidade ba povu remotas liu-liu ami suku Soba, ami la sente ukun ida ne’e, tanba eletrisidade laiha, estrada mos laiha,’’ Francisco rekomenda.
Hatan ba preukupasaun ne’e, Kandidatu Prezidente Repúblika númeru 1, Premiadu Nobe ba Paz, José Ramos Horta hatan hodi dehan, lakohi promete tanba governu mak kaer programa tomak, maibé prezidente repúblika bele ko’alia maka’as iha planu governu atu hadia komunidade nia moris.
Ha’u sei tau matan ba ida ne’e, fatin barak mos izoladu teb-tebes, prioridade númeru um mai hau mak kualidade edukasaun, eskola merenda eskolar, saúde no nutrisaun ba inan isin rua no labarik kosok-oan sira nia nutrisaun di’ak,’’ Ramos Horta afirma.
Horta dehan, kona-ba preukupasaun estrada suku Soba nian, sei ko’alia ho embaixada ruma hanesan Korea ho Amérika sira mós ko’alia kona-ba estrada rural, sira prontu apoiu estrada, eskola no saúde, tanba konese malu di’ak.
Ha’u konese di’ak sira, no sira bele halo desizaun urjénsia labele hein governu, tanba hein governu foun mai la hatene bainhira, tanba balun lakohi eleisaun antisipada hakarak metin ho oitavu governu, maibé governu ne’e ita labele bolu oitabu governu konstitusional, tanba prezidente viola konstituisaun mak governu ida ne’e kotinua, agora governu foun mai ha’u sei ko’alia, ha’u liafuan mak ne’e obrigadu,’’ Horta hakotu lia.
Iha diálogu ne’e, partipasaun másimu husi populasaun suku Soba, observasaun husi CNE, asegura seguransa husi polísia, tuir planu ekipa dor to dor lidera husi prezidente partidu PSD kontinua diálogu ho populasaun suku Kuelekai hafoin ohin tersa (12/04/22) fila hikas ba Dili.
Jornalista : Agapito de Deus
Editor : Floriano Soares
