Lafaek News–Prezidente Repúblika (PR), Francisco Guterres Lú Olo hatete, Instituisaun Militár hanesan riin importante ba Timor Leste, bele hamriik nu’udar Pátria.

Lú Olo hatoo asuntu ne’e iha serimonia aniversariu F-FDTL ba dala-21 iha kuartel jerál Fatuhada, kuarta (02/02/2022), katak se forsas armadas laiha uniaun, laiha kbiit no laiha prestíjiu mak Timor-Leste sei laiha uniaun, laiha kbiit no laiha prestíjiu.

Instituisaun Militár hanesan riin importante tebes ida atu ita bele hamriik nu’udar Pátria, Se Forsas Armadas la iha uniaun, la iha kbiit no la iha prestíjiu, mak Timor-Leste sei la iha uniaun, la iha kbiit no la iha prestíjiu,’’ dehan PR Francisco Guterres Lú Olo,

Tuir Xefe estadu FALINTIL-Forsas Defeza Timor-Leste hanesan instituisaun ida ne’ebé iha hela evolusaun nia laran no la’o tuir nia dalan tuir limitasaun sira-ne’ebé mosu hosi kontestu nasionál.

Dezafiu ne’ebé iha nia oin hanesan ezersísiu kompleksu ida ba jestaun nesesidades, intereses no ojetivus, ne’ebé bele rezolve de’it liuhosi prosesu planeamentu ida ne’ebé rigorozu no ezijente kona-ba defeza nasionál no forsas”.

PR Lú Olo akresenta tan, prosesu hirak-ne’e estabelese ona iha lei, liuliu iha estratéjia militár nia dokumentu estruturante hirak ne’ebé foin lalais aprova.

Loos duni katak ita presiza hadi’a nafatin kuadru legál no regulamentár ba dezenvolvimentu no reforsu hosi instituisaun militár, hodi halo nia sai presiza no efetivu liután, atu nune’e bele hetan konsensu ida ne’ebé luan hosi ajente polítiku no órgaun soberania tomak,’’ dehan PR Lú-olo.

Xefe Estadu afirma tan, klaru ké presiza harii sistema forsas nia kapasidade sira, tanba ne’e mak  luta naba-naba atu halo  forsa sira sai ekipadu di’ak liután, maibé ema sira-ne’ebé hatene istória, hatene mós katak ema rasik no sira-nia vontade atu luta mak halo diferensa. No ita sei kontinua nafatin hanesan ne’e  Instituisaun Militár ne’e ba futuru tenke kompostu hosi ema militár ké iha kompeténsia no motivasaun, ne’ebé tuir padraun aas liu ba formasaun, kualifikasaun no treinamentu.

Jornalista : Rita Moniz 

Editór         : Agapito de Deus