Lafaek News-(Ossu)-Tenente Jeneral Reformadu nu’udar mos Kandidatu Prezidente Republika periodu 2022-2027, Lere Anan Timor hasoru malu hikas ho Lider Istóriku, Kay Rala Xanana Gusmão no Kandidatu Prezidente Republika, José Ramos Horta iha Larigutu
Hasoru espontania entre Lere Anan no Xanana- Ramos Horta ho ambiente haksolok nu’udar momentu importante no istóriku no importante ida ne’ebe aserta kedas iha loron 3 de Marsu 2022 nu’udar loron importante ba eroi Veteranus sira iha Timor-Leste.
Olla… boaterde maun nain rua, imi di’ak kalae, ami foin termina kampana iha viqueque maka fila,” Dehan Lere akompana hosi ninia epoza hodi kumprimenta Xanana-no Ramos Horta iha komunidade sira nia rezidensia area Larigutu-Ossu-Viqueque.
Maski hasoru malu ne’e hodi kumprimenta malu de’it, maibé hatudu ba públiku katak, Xanana no Lere nu’udar veteranu nunka soe malu, no sira nia unidade hanesan “BESI ASU” ne’ebe ema labele fahe. Mezmu iha palku polítiku sira haksesuk malu, maibé iha kotuk no dalan kloot ruma sira sempre hatudu nafatin sira nia jestu hadomi no respeita malu hodi fo lembra nafatin ba ema hotu katak, tinan 24 iha sira funu no terus hamutuk.
Xanana Gusmao mos sente kontente hodi simu hasoru kedas Lere Anan Timor.
Lere tenki hanesan ne’e duni, ami mos foin remata kampañia iha Baukau agora mai Vikeke,” dehan Xanana ho hamanasa.
Tempu hanesan mos, Ramos Horta ho orgullu agradese ba Lere no nia espoza.
Enretantu, tuir observasaun Lafaek news nota katak, ambitante no apoiantes kandidatu Prezidente Repúblika, José Ramos Horta no Lere Anan Timor ne’ebe asiste hasoru malu pasífiku ne’e sente haksolok no orgullu hodi fo lembra katak iha tinan 38 liu ba, mosu eventu istoriku ida iha luta imoroan sira nian ba ukun-rasik-an. Loron istoriku ne’e mak loron 23 fulan Marsu, loron ne’ebe Komandante Boot FALINTIL, Xanana Gusmão, hasoru malu ho Koronel Poerwanto, Komandante Boot militar Indonezia nian iha Timor, iha Larigutu, iha 1983.
Loron ne’e importante tanba, iha loron ne’e mak foin ba dala uluk, mosu dialogu ka negosiasaun ka konesidu liu ho “conversações da paz” entre Timor no Indonezia. Imporante mos tanba hatudu FRETILIN muda ona nia politika no prinsipiu ne’ebe antes defende “negociação não e nunca” ho se de’it mak la defende ukun-rasik aan ba Timor.
Molok akontese sorumutu ne’e, iha akontesimentu lubun ida mak mosu ona, akontesimentu hirak ne’e mak halo Indonezia fiar metin katak sira kontrola tomak ona Timor no povu Timor kontente ona ho integrasaun. Hela de’it ona FALINTIL mak presiza konvense tan, hodi tun mai rende hodi Timor sai permanentemente parte husi Indonezia nian.
Jornalista : Orlando Magno
Editor : Agapito de Deus
