Lafaek News—Movimentu Juventude Defisiensia Timor Leste (MJDTL) deklara pozisaun nafatin rejiste hamutuk ho Estudante Universitariu Timor Leste (EUTL) hodi akompaña desizaun Parlamentu Nasional halakon pensaun vitalisia.
Iha konferensia imprensa portavoz MJDTL, Cárceres Nunes Arca Tura argumenta, iha manifestasaun loron 15-17 setembru 2025 rejulta diálogu entre PN ho EUTL, no hosi diálogu ne’e konklui ho akordu importante entre EUTL ho PN hodi kansela sosa kareta luxu ba deputadu 65 inklui akordu halakon lei pensaun mensal Vitalisia.
“Ami husu ba deputadu sira iha Parlamentu Nasional hatudu sentidu estado iha diskusaun Plenaria tanba lei pensaun vitalisia kontra ona prinsipiu justica social, razaun la reprezenta povu nia interese, ami ezize parlamentu nasional atu demonstra responsablidade no nasionalista hodi halakon lei refere, hanesan reprezenta povu tenke halo desizaun ne’ebé afavor ba povu nia interese atu nunee bele garante nafatin transparansia no konfiansa povu ba parlamentu nasional,” portavoz Movimentu Juventude Defisiensia hatoo asuntu ne’e iha konferensia imprensa iha Manleuana Dili, 24/09/2025.
Nia hatutan manifestasaun ne’e tuir lei hatudu katak, joventude, estudante no sosiedade nafatin firme konsistente no disiplina iha luta ba justisa sosial bainhira laiha solusaun ba sira nia ezijensia mak demonstrasaun sei manas liután.
Justino Belo nudar membru Movimentu Juventude Defisiensia Timor Leste, rekomenda ba Lideransa partido 5 ne’ebe asentu iha parlamentu nasional liu-liu CNRT, FRETILIN PD, KHUNTO ho PLP atu tuur hamutuk halo diálogu hodi fo hanoin ba deputado 65 iha parlamentu nasional atu halakon totalmente lei pensaun vitalisia ho rejime sira neebe la fo valor ba moris Povu nian.
“Ami husu ba Lider prezidente partido sira hanesan Maun Boot Xanana, Lú-Olo, Mariano Asanami Sabino Lopes, Taur Matan Ruak ho José dos Santos Naimori Bucar atu tuur hamutuk diálogu hodi fo hanoin ba deputado 65 iha parlamentu nasional atu halakon total lei pensaun vitalisia ho rejime sira ne’ebe la fo valor ba povu nia moris,” Justino Belo rekomenda.
Jornalista : Natalino C. Lopes
