Lafaek News–(Baukau)‐Diretór Servisu Saúde Munisípal Baukau (SSMB), Domingos Reinaldo da Costa Guterres informa, totál liña frente iha Munisípiu Baukau hamutuk na’in 217 mak simu ona vasina Booster Pfizer.
Vasina Pfizer sei uza ba sira ne’ebé mak liña frente, Baukau foin mak ita uza ba ita nia F-FDTL sira, mak hetan uluk ona, sira totál iha 123 momentu ne’eba sira ba tugas iha fronteira, despois tuir mai maluk sira husi pesoál saúde sira, hamutuk to’o horseik totál 217 ne’e mak vasina ona,”dehan Domingos iha nia kna’ar fatin Reamare, tersa feira (08/02/2022)
Nia hatutan, maske nune’e maibé kontinua fahe informasaun liuhusi dalan oin-oin ba liña frente sira ne’ebé seida’uk simu bele simu vasina Booster Pfizer nune’e bele aumenta imunidade di’ak liután hasoru pandemia ne’ebé mak iha.
Tanba vasina Booster Pfizer ne’ebé mak da-daun iha Munisípiu Baukau, husi parte rejiaun leste, foin mak implementa de’it iha Baukau, enkuatu munisípiu seluk hanesan Vikeke no Lautém seida’uk iha.
Ha’u hanoin booster ne’e, parte husi região Leste ne’e foin implementa iha Baukau ne’e, seluk hanesan vikeke lospalos sira ne’e seida’uk, semana kotuk sira Munisípiu seluk sira kontaktu mai atu mai vasina,”nia afirma
Nia hateten, vasina Booster Pfizer ne’ebé mak Ministéiru da Saúde oferese mai Munisípiu Baukau hamutuk vial-100, maibé dadaun ne’e sei iha vial-62, tanba liña frente barak mak seida’uk simu vasina Booster, maibé ékipa husi servisu saúde Munisípiu Baukau iha loron 08 fulan fevereiru tinan 2022 (ohin) ba tán iha nasionál husi aumente vial vasina Booster nian.
Sei barak mak seida’uk vasina, laos saúde de’it mak liña frente, maibé jornalista sira mós liña frente,”katak nia
Nia sublina, vasina Booster Pfizer ne’ebé da-daun ne’e la’o iha munisípiu Baukau, realiza iha Servisu Saúde Munisípal Reamare Baukau, seidauk implementa hotu iha sentru saúde sira, tanba sei prioridade ba sidadaun sira ne’ebé servisu iha liña frente.
Sei iha ne’e de’it konsentra iha Reamare servisu Saúde Munisípal nian, seida’uk iha fatin seluk,”nia afirma
Entretantu vasina Booster Pfizer lansa iha loron 27 fulan-janeiru tinan-2022 iha fatin primeiru Batallaun Falintil-Forsa Deféza Timor-Leste (F-FDTL) Lanud Baukau.
Jornalista : Joãozinho Bosco
Editor : Agapito de Deus
