Lafaek News—Xefe Estadu Maior Jenerál Falintil Forsa Defeza Timor Leste (F-FDTL), Tenente Jenerál Lere Anan Timur informa la aseita atu material militár sira hanesan kilat musan labele loke tenderizasaun ba kompañia hodi hetan porsentu.
“Nesesidade ida ne’ebe ami iha mak infra-estrutura, material ida ne’e mos ha’u hatoo ba Presidente Repúblika atu hatoo ba primeiru ministru katak ba instituisaun militar ba material militar sira ha’u lakohi fo ba kompañia, Instituisaun ba direitu, direitu ba fabrikas, ne’e militar ne’e la’os sosa sosa hahán ita tender fali, ne’e material kilat Musan, tenke ba direitu, hateten Xefe estadu major, Jeneral Falintil forsa defesa Timor_leste (F_FDTL), Tenente Jenerál Lere, Anan Timur iha palasiu Presidensial Nicolau Lobato, Kuarta 23/06/2021.
Afirma Tenente Jeneral, instituisaun ho fábrika ka governu ho fábrika ida ne’e di’ak liu, labele halo hanesan uluk nian, kilat musan mos tenke tenderizasaun, sosa kilat mos konkursu públiku, sosa kareta mos hanesan, ne’e dala ruma ne’e interese iha laran, ne’e atu pursentu ne’e tama kompañia manan hetan 90%.
“Ha’u nudar Jeneral ne’e ha’u nian 10%, ida ne’e mak dala ruma mosu la’o iha ami nia kakutak ne’e, ida ne’e ha’u kontra, iha ha’u nia instituisaun mak hanesan ne’e ohin kedas ha’u duni sai imi,”Lere akresenta.
Jornalista : Rita Moniz
Editór : Agapito de Deus
