Lafaek News—Governu liu husi Konsellu Ministru (KM) deside atu propoin ba Prezidente Repúblika renova tan estadu emerjensia ba dala-15.
“Hafoin halo análiza ba aprezentasaun husi Pontu situasaun epidemiolójika nasionál, husi Sala Situasaun Sentru Integradu Jestaun Krize, Konsellu Ministrus delibera atu propoin ba Sua Eselénsia, Señor Prezidente Repúblika, Francisco Guterres Lú Olo, ba renovasaun estadu emerjénsia, ba loron tolu-nulu tan,”dehan Fidelis Leite Magalhães, iha konferénsia imprensa, iha Palasiu Governu, kuarta (23/06/2021).
Governante ne’e akresenta, estensaun EE bad ala-15c atu atende ba evolusaun prekupante situasaun epidemiolójika no proliferasaun kazu rejistadu husi kontájiu Covid-19, ho hanoin atu evita no neutraliza risku propagasaun sira husi SARS-CoV-2, atu bele proteje saúde públika no kapasidade resposta ba Sistema Nasionál Saúde.Tanba ne’e, Governu propoin ba Prezidente Repúblika katak, ho renovasaun estadu emerjénsia, atu permite suspensaun no restrisaun ba direitu no garantia fundamentál balun.
Enkuantu, molok ne’e Prezidente Repúblika prolonga estadu emerjensia ba dala-14 hahú iha loron 2 fulan-Juñu no sei termina iha loron 1 fulan-Jullu.
Jornalista : Juvita dos Santos
Editór : Agapito de Deus
