Lafaek News—Relasiona ho jogu Kopa Europa 2020, ne’ebé sei akontese orasida entre Portugál kontra Franca ho nune’e, Polísia Nasionál Timor-Leste (PNTL) liu husi departamentu tránzitu sei kontinua pasa revista ba adeptus sira husi Portugál ne’ebé la kumpre regras kódigu estrada nian iha kapitál Dili.
Tuir komandante PNTL munisípiu Dili Superintendente Xefe Henrique da Costa, hateten iha ona preparasaun no PNTL identifika ona fatin 10 iha kapitál Dili hodi pasa revista ba adeptus sira ne’ebé la kumpre regras.
“Ita iha ona planu preparasaun ba ida orsida hahú tuku haat (4) ne’e ita nia ekipa sei halo pasa revista iha fatin 10 ne’ebé mak identifika ona, no ita husu para atu nune’e adeptus sira halo movimentu tenki kumpri regras kódigu estrada nian,” esplika Komandante PNTL munisípiu Dili Superintendente Xefe, Henrique da Costa, ba jornalista sira iha Ministériu Interior, Kaikoli Kuarta (23/06/2021)
Nia hatutan, respeitu mós ema seluk nia direitu, labele uza motor kanu resin ba gas double hodi interompe ema seluk atu deskansa iha tempu kalan.
“Husu atu ita mós respeita ema seluk nia simbolu, ema nia Bandeira iha ema nia Nasaun ema respeita tebes, tanba ita fanatik ba iha jogadór balun ita uza sala fali ema nia simbolu ne’e, nafatin respeita ema seluk nia simbolu hanesan Bandeira Nasaun ne’e nian,” dehan nia
Komandante ne’e informa, sira sei nafatin halo atuasaun hanesan iha semana kotuk ne’ebé mak prenda motor hamutuk 146 ne’ebé halo prosesu hotu ona no ida-ne’e sei nafatin aplika iha eskuadra hotu iha Díli nian.
Jornalista : Sandi Belo
Asisten Editór : Egidio Nono
