Lafaek News–Prezidente Kámara Komérsiu Indústria Timor Leste (CCI-TL), Oscar Lima afirma infelizmente labele fo kulpa ba joven Timor-oan halai ba servisu iha rai liur tanba kampu servisu iha rai-laran seidauk iha, governu presiza prepara formasaun ba foin sa’e sira ho kualifikadu atu bele responde ba servisu iha rai-liur.
Ha’u haree joven barak tebes, laiha tan dalan seluk como iha rai-laran laiha kriasaun empregu sufisiente automatikamente ita nia joven sira tenke hili dalan ida ba servisu iha rai liur, ita la kulpa ba sira ne’ebé ba servisu iha ema rain,’’katak Oscar Lima ba lafaek news iha kna’ar fatin foin lalais.
Lima hateten, iha ema nia nasaun seluk hanesan postura polítika Cabo-Verde kuaze ninia ema matenek hodi para ba servisu iha fatin seluk hodi fo income ba sira ninia nasaun, hein katak joven Timor sei fo income ba nasaun Timor Leste, tanba agora da-daun sira hatudu ona, signifika joven sira ne’ebé servisu iha rai liur kontribui orsamentu mai rai-laran boot teb-tebes.
Ida ne’e ita labele bandu tanba direitu ema ida-idak bele hili, servisu ne’ebé sira halo ne’e servisu ida dignu tebes no brani kontribui ba nasaun nia ekonomia, ida ne’e ita hotu preukupa tanba governu mos agora la dukur atu treina ema,’’katak Lima.
Tanba ne’e, Timor-oan sira ne’ebé ba servisu iha rai-liur iha vantajen no des-vantajen, vantajen di’ak mak kontribui orsamentu mai nasaun ninia ekonomia liu husi hadia nesesidade uma laran no harii uma di’ak iha sira nia moris fatin, maibé des-vantajen mak bainhira sira laiha preparasaun ne’ebé di’ak, entaun governu presiza fasilita formasaun ida kualidade molok Timor-oan ba servisu iha rai liur.
Jornalista : Agapito de Deus
Editor : Floriano Soares
