Lafaek News–Komandu FALINTIL Forsa Defeza Timor-Leste (F-FDTL), hosi Komponente Naval Lijeira (CNL-sigla Portugés), kansela festa selebrasaun aniversáriu ba dala XIX (19) tanba da-daun ne’e mundu tomak inklui Timor Lorosa’e ne’ebé hetan ameasa mós hosi surtu COVID-19.
Komandante Komponente Naval Lijeira, Kapitaun Fragata, João da Silva, afirma liga-du ba problema ne’ebé mak da-daun mundu no Timor Lorosa’e hasoru (COVID-19), maka deside kansela festa aniversáriu refere hodi kumpre ba dekretu governu atu evita propagasaun surtu COVID-19.
“Atu evita problema moras COVID-19, ha’u husu konsiderasaun ba parte hotu nia komprende saun, ba desizaun ne’ebé Komandu FALINTIL F-FDTL hodi kansela serimónia solene ba komemorasaun aniversáriu KNL ba dala-XIX ne’ebé sei hala’o iha 12 Janeiru 2021,” dehan Kapitaun de Fragata, João da Silva ba jornalista iha Komponente Naval, Hera, Dili Kinta semana ne’e.
Argumenta nia, mezmu ho ameasa hosi inimigu invizivel (COVID-19) sei la hamate espíritu serbí no nafatin kapasita aan liuhosi formasaun hodi aumenta iha area oioin ba membru sira hodi servisu agora no futuru di’ak liután.
“Ami sei hasoru dezafiu barak, internu finanseira, rekursu maibé ida nee la hamate ami nia espíritu hodi serbí no kapasita nafatin membru sira hodi konsolida forsa sai metin hodi serbí nasaun,” dehan nia
Salienta nia, alende ne’e komandu komponente naval mós prepara ona rekursu hodi hola parte mós iha servisu iha Autoridade Marittima Nasionál hodi próteze riku rai doben Timor Lorosa’e.
Jornalista: Orlando Magno
Editór : Ezequias Tomás
