Lafaek News- Maski governu liuhosi reuniaun konsellu ministru aprova ona projetu dekretu governu kona-ba medida ba ezekusaun estadu emerjénsia nian ne’ebé renovadu hosi dekretu prezidente repúblika Nu. 73/2020 loron 30 Dezembru hatán ba pandemic COVID-19.

Tuir dekretu governu rekomenda katak ba ema hotu-hotu ne’ebé la sujeita ba izolamentu obrigatóriu no ne’ebé la hala’o kualkér atividade profisionál atu marka prezensa iha servisu fatin tenke hela metin iha uma, bainhira la’o ain iha fatin públiku tenke la’o mesak no uza máskara no mantein distánsia fíziku pelumenus metru 1 hosi ema la’o ain seluk no evita halibur malu.

No ba ema ne’ebé viola sei assume responsabilidade kriminál tuir regra ne’ebé hakerek iha kódigu penal, tanba tuir kódigu penal artigu 244 kona-ba dezobediénsia, ne’ebé hatete katak ba ema ne’ebé la kumpre ka halo tuir mandadu lejítimu komunikadu regulamentu ne’ebé autoridade ka funsionáriu kompetente maka sei hetan pena prizaun tinan 3.

Maibé iha realidade tuir observasaun ekipa Lafaek News iha terenu nota katak, negosiante balun de’it maka kumpre regra estadu emerjénsia maibé maioria la kumpre saida maka governu deside tiha ona.

Tuir mai iha dada lia badak entre jornalista Lafaek News ho negosiante balun iha merkadu Taibesi hatete katak sira atu kumpre oinsá, la iha espasu tanba kondisaun merkadu ne’ebé ki’ik no kloot, tanba ho volume vendedór no aumenta tan comprador sira ne’ebé sempre mai hola sasán maka difisil ba sira atu kumpre regra ne’ebé iha maski sira rasik hatene ne’e mós importante ba saúde maibé atu halo tan oinsá buat hotu nesesidade ekonomia maka obriga.

Negosiante ne’e haktuir tan, hakarak ka lakohi la obedese ba regra ne’ebé iha maski sira sei assume responsabilidade kriminál maibé tanba nesesidade ba uma laran hakarak ka lakohi sakrifika vida hodi nesesita ezijénsia uma laran.

“Kona ba regra estadu emerjénsia fó sai ona, maibé ami vendedór sira nafatin la kumpre regra ne’ebé  mak estabelese, dehan katak tur ho distánsia maibé ami iha merkadu kontra nafatin regra ne’ebé mak iha, dala ruma ami halibur malu liu fali ema na’in sanulu no tuur mós dala ruma belit malu de’it,” dehan negosiante Estêvão Oliveira de Deus ba jornalista lafaek News kinta semana ne’e.

Reforsa nia, regra ne’ebé governu hasai ona barak maka la kumpre iha merkadu, tanba ne’e nafatin prontu hodi hein sansaun saida mak governu hakarak foti, nafatin koopera maibé nesesidade ekonomia uma laran sai responsabilidade sé nian kuandu merkadu governu hapara atividade negósiu tanba de’it viola regra EE.

Iha sorin seluk Vendedór Francisco Pinheiro hato’o lia hanesan, regra ne’ebé mak governu estabelese ona ne’e di’ak atu bele prevene ita nia aan hodi hadook hosi moras COVID-19 maibé tanba ekonomia uma laran maka hakarak ka lakohi atu kontinua moris nafatin fa’an sasán maski regra EE bandu labele halibur malu liu na’in 10, tur distánsia fíziku pelumenus metru 1 entre ema ida ho ema seluk.

Kontribuitora  : DV

Editór               : Ezequias Tomás