Lafaek News-Negosiante fa’an Foos iha Tasi-tolu, Rosalinda da Silva Soares, afirma kona-ba folin ne’ebé da-daun ne’e presu sa’e kauza husi distributor ka empreza sira ne’ebé sosa husi rai liur.
“Agora ne’e foos mak menus de’it, baibain ami ba sosa iha Gudang (armazena) Globus Fatu hada nune’e ami fa’an, maibé depende ba folin iha ne’ebá karik sa’e, ami fa’an mós sa’e, karik tu’un ami fa’an mós tu’un, ne’e duni ami manan de’it centavo 0.25 ka 0.50 de’it,” informa Rosalinda ba Lafaek News iha loja Nometa Tasi-tolu, Sesta (08/01).
Reforsa nia, daudaun ne’e foos ho kilograma 20 no 25 la iha maski iha mós tanba folin sa’e difikulta tebes ba sira ne’ebé hanesan vendedór atu sosa hodi fa’an fali.
Argumenta nia, folin foos sa’e la’ós foin maibé dezde antes tama ba natal, tanba ne’e agora fa’an de’it foos ho kilograma 30 ho folin $15,50 centavos.
“Foos kilograma 30 ne’ebé daudaun ne’e ami fa’an mak hanesan, Globus, Columbus, Tali Merah no Furak liu. Nune’e foos 30 kg sira ne’e hotu-hotu ami fa’an halo $15.50 hotu,” informa Nia.
Haktuir nia, natoon foos kilograma 20 iha fa’an ho folin $11,50 no kilograma 25 fa’an ho folin $13.
Dehan nia, maibé entre foos sira ne’e ida ne’ebé mak di’ak no folin karun uitoan maka foos Folsom, foos refere kilograma 20 de’it ho folin $13.
Entretantu iha sorin seluk comprador Jaimito Martins Amaral katak antes tama natal ne’e foos ho kilograma 20 ba sosa ho de’it folin $10,50 centavos maibé ida ne’e nakfilak no sa’e makas ba fali $11,50 centavos.
Tanba ne’e nia husu ba governu atu tau atensaun hodi halo kontrolu ba agent ka empreza sira ne’ebé fa’an foos atu nune’e labele hasa’e folin tuir gostu, tanba sé problema ne’e governu la tau atensaun maka halo susar povu ne’ebé rendimentu la iha ou ki’ik liu.
Dehan tan nia, tanba to’o agora foos ho kilograma 20 nia folin nafatin dollar 11,50 centavos no la hatene bainhira folin foos atu fila fali ba folin normal.
Jornalista: Juvita dos Santos
Editór : Ezequias Tomás
